SIRIMANA, STLTIMORLESTE.com – Estrada ba Aldeia Sirimana, Suku Atelari, Postu Administrativu Laga, Munisipiu Baukau, ho distansia liu kilometru (Km) 15 kondisaun aat.
Preokupasaun nee Xefe Suku Atelari, Paulo José Ximenes ba jornalista STL iha Sirimana, Kuarta (07/01/2025).
“Estrada mai Sirimana sura husi estrada boot mai too Borudua 10 kilo too mai Sirimana 15 ital. Tempu bailoron diak oituan, maibe tempu udan difisil tebes-tebes asesu merkadu,” Informa Paulo.
Aldeia Sirimana potensial ba produtu lokal hanesan Kami’i, Nu’u, Talas, Fehuk, Batar, Ai-farina, Maek no produtu lokal seluk tan, neebe durante nee komunidade sira iha Aldeia refere faan produtu lokal hirak nee iha merkadu Baguia no Laga hafoin hetan rendimentu hodi sustenta ekonomia familia.
Maibe kauza kondisoens estrada husi Aldeia Sirimana ba too iha estrada Diresaun Baguia-Laga area Defauasi nian liu kilometru 15 difikulta tebes movimentasaun transporte hodi transporta komunidade sira nia produtu lokal ba merkadu, tanba kondisaun estrada aat no grave.
“Iha tempu udan sira tutur rasik mak ba bazar lao dook, preokupasaun ba komunidade sira, tanba kondisaun estrada i difisil tebes-tebes ba komunidade bainhira morae tanba dook,” Paulo hateten.
Estrada ba Aldeia Sirimana aleinde fo impaktu ba komunidade sira nia asesu iha merkadu fo mos impaktu seluk ba komunidade sira, bainhira moras susar atu transporta ba fasilidade saude, tanba komunidade sira iha Aldeia refere dook husi fasilidade saude.
Nunee Autoridade Suku esforsu ona aprezenta problema refere iha Assembleia Postu Administrativu (ASPA) no iha ona rezultadu, tanba ajuta ona iha programa tinan 2025 orsamentu ba estrada refere aloka ona no ekipa Munisipiu too ona terenu rekoilha dadus, tuir planu sei reabilita iha tinan nee, maibe sei reabilita deit estrada kilometru 10 husi Defauasi too Suku Wakala, Postu Baguia.
No husi Suku Wakala ba Aldeia Sirimana Suku Atelari, Autoridade Suku Atelari ajusta ona iha programa prioridade Suku nian neebe sei responde ho orsamentu husi Programa Nasional Dezenvolvimentu Suku (PNDS), tanba Aldeia Sirimana iha pontensial idade oin oin, maibe nuudar Aldeia izoladu liu iha Postu Laga.
“Area potensial mak hanesan animal fuik mos barak, Sirimana hamutuk ho Suku vizinhu Luro, Lautem nian mos tama ona iha nivel Nasional Legumau rekursu fatuk fatu kadi,” Paulo katak.
Suku Atelari iha Aldeia 10 neebe sei prezisa orsamentu husi PNDS kada tinan, maibe orsamentu neebe kada tinan aloka liu husi PNDS ho montante neebe seidauk sufisiente atu rezolve preokupasaun neebe komunidade sira infrenta, mak Autoridade Suku Atelari kontinua esforsu liu husi koordenasaun ho parseiru dezenvolvimentu sira liu liu Ministeriu Obras Publikas hodi apoiu reabilitasaun estrada ba Aldeia Sirimana.
Entretantu komunidade neebe hela iha Aldeia Sirimana, Suku Atelari, Postu Administrativu Laga, Munisipiu Baukau hamutuk uma kain 39 baliza ho Suku neebe pertense ba Postu Administrativu Luro, Munisipiu Lautem.
Liga asuntu nee STL tenta konfirma Koordenador Tekniku Obras Publikas Destakadu Munisipiu Baukau, maibe laiha fatin atu fo komentariu.
Jornalista: Tomas Reis
