BAUKAU, STLTIMORLESTE.com – Estrada diresaun husi Baguia Vila ba Suku Afaloikai, Postu Administrativu Baukau, Munisipiu Baukau kondisaun aat, tanba nee Autoridade Suku submete ona pedidu atu halo reabilitasaun, maibe Governu seidauk fo resposta.
Xefe Suku Ossohuna, Paulo dos Reis Piedade esplika, estrada diresaun husi Baguia Vila too Suku Afaloikai fo asesu ba komunidade sira husi Suku Alawa Kraik, Haekoni, Ossohuna no Afaloikai iha neebe maioria komunidade husi suku 4 refere maioria moris ho vida agrikultura iha produtu lokal oin oin atu asesu ba merkadu Postu no Munisipal, maibe iha tempu udan komunidade sira labele lori produtu lokal sira ba asesu merkadu, tanba kondisaun estrada aat no iha tempu udan transporte publiku sira labele too iha Suku refere hodi tula komunidade sira nia produtu lokal.
“Ami sempre hatoo prekupasaun sira nee, maibe pedidu sira neebe too agora seidauk hetan serteza, hau husu bele karik aselera ami nia estrada nee,” hateten Xefe Suku Ossohuna Paulo dos Reis Piedade ba jornalista sira iha salaun apuramentu Vila Nova Baukau, Sesta (27/03/2026).
Nia informa, estrada diresaun husi Baguia Vila ba Suku Afaloikai hamutuk kilometru 10 resin neebe tinan naruk ona difikulta komunidade sira nia movimentu ho transporte, tanba nee Autoridade Suku submete pedidu ba parte kompetente atu halo reabilitasaun, maibe seidauk iha atensaun.
Nunee husu parte kompetente liu liu Ministeriu Obras Publikas atu haree kondisaun estrada refere, tanba estrada kondisaun aat inklui mota rua hanesan Basarwai no Rudoho’o neebe difisil atu utrapasa bainhira mota tun.
“Bainhira kondisaun estrada diak sei fo benefisiu ekonomia ba komunidade tanba area neeba pontesial ba setor turism foho Matebian, abrigu rezistensia no bele koneksaun entre Munisipiu Baukau ho Vikeke,” Paulo akresenta.
Entretantu populasaun husi Suku 4 neebe asesu estrada refere hamutuk nain 7.745 kompostu Suku Afaloikai ho populasaun hamutuk nain 1.639, Alawa Kraik nain 1.934, Haekoni nain 2.807 no Ossohuna iha populasaun hamutuk nain 1.365.
(tom)
