BAUKAU, STLTIMORLESTE.com – Atual estrada ligasaun husi Postu Administrativu Laga ba Suku Afasa, Postu Kelikai, Munisipiu Baukau, iha area Samaguia Suku Tekinomata nakfila sai debu ba karau iha tempu udan.
Kondisaun estrada atual ba Postu Kelikai Antigo mos daudaun difikulta tebes movimentu ema ho transporte publiku no privadu, tanba rai mutin neebe antes nee kompanhia halo reabilitasaun udan been kuaze sobu total ona no hela deit estrutura estrada anterior nian, neebe loke husi kompanhia Indonezia iha tempu invazaun.
“Agora daudaun difikulta ba ita nia komunidade sira, tanba estrada husi Samaguia ba too Afasa nee aat tebes,” hateten Xefe Suku Afasa, Joaquim Fernandes Ximenes ba STL iha vila antiga Baukau, Segunda (18/11/2024).
Nia esplika, kondisaun estrada refere husi Diresaun Laga-Afasa Governu kontratu ona kompanhia lokal balun neebe daudaun halo reabilitasaun, maibe tuir kontratu too deit iha area Samaguia, enkuantu husi area Samaguia hodi kontinua ba Suku Afasa daudaun aat no grave, tanba kuak barak kauza udan been nalihun iha fatin sai debu ba karau.
Ho kondisaun estrada refere parte Suku relata ona proposta ba diresaun Ministeriu Obras Publiku atu fo solusaun, tanba Suku Afasa sai sentru ba reativa Postu Administrativu Kelikai Antigu, neebe fo asesu ba komunidade sira husi Suku Namanei, Gurusa, Afasa inklui komunidade husi Postu Laga liu-liu Suku Tekinomata sorin, maibe daudaun estrada kondisaun aat no grave iha neebe tempu udan transporte sira hanesan karreta labele halo movimentu, tanba rai namdoras.
Hatan ba kestaun nee, Diretor Servisu Ministeriu Obras Publiku Munisipiu Baukau, Agostinho Ximenes rekonhese, estrada rural ligasaun husi area Samaguia ba Afasa daudaun kondisaun aat no grave, tanba impaktu husi udan.
“Iha area Samaguia natar laran ba too Afasa Semiteriu nee nia dadus ita submete ona ba nasional, maibe agora sei re-koopera hela, tanba sa mak iha nasional pendin nee hau la hatene,” nia informa.
Diretor nee relata, estrada husi area Samaguia too Suku Afasa parte semiteriu nian hamutuk km 5 resin neebe antes nee submete ona dadus ba parte nasional no fahe ona ba pakote 2 atu loke koutasaun, maibe sei pendente, tanba laiha orsamentu.
(EST 2)
