BAUKAU, STLTIMORLESTE.com – Estrada diresaun husi area Dailari ba Aldeia haat iha Suku Soba, Postu Administrativu Laga, Munisipiu Baukau, oras neebe kondisaun aat no grave.
Xefe Suku Soba, Fransisca Monica de Fatima Correia esplika, Suku Soba iha Aldeia neen kompostu husi Aldeia Eu-Uai, Betufalu,Laukua, Boleha, Asanunu no Fatiliri, neebe estrada ba Aldeia Eu-Uai no Betufalu asesu estrada kondisaun diak, tanba lokaliza iha Postu Laga besik estrada nasional diresaun Baukau-Lautem, enkuantu Aldeia haat seluk hanesan Boleha, Laikua, Asanunu no Fatiliri oras nee kondisaun estrada aat no grave, tanba lokaliza iha area remotas.
“Ami nia estrada liga ba Sede Suku nia kondisaun grave tebes, no Aldeia neebe dook liu husi Suku mak Asanunu, Fatiliri, Boleha, Laikua, difikulta tebes komunidade sira,” hateten Monica ba jornalista STL iha Postu Laga, Kinta (12/06/2025).
Nia sublina, kondisaun estrada husi area Dailari ba Aldeia haat refere antes nee halo ona reabilitasaun ho rai mutin, maibe utiliza ona tinan naruk no daudaun aat hikas fali, tanba impaktu husi udan.
Nia fundamenta, estrada diresaun ba Aldeia haat refere ho distansia kilometru 16 neebe fo asesu ba komunidade sira husi Suku Soba, aleinde mos fo asesu ba Suku vizinhu Libagua Aldeia Buibata inklui Suku Namanei Postu Kelikai Antigu.
“Suku Soba iha Postu Saude ida iha Boleha komunidade Aldeia haat nee asesu Saude iha neeba, liga ba Edukasaun mos eskola iha Aldeia Fatiliri no Asanunu, neebe kondisaun estrada nee difikulta ba komunidade sira lori produtu lokal ba iha merkadoria,” Monica akresenta.
Ba preokupasaun estrada refere, Xefe Suku nee argumenta, Autoridade Suku kontinua esforsu liu husi reuniaun Konselhu Suku aprezenta iha reuniaun Asembleia Postu Administrativu hodi kontinua enkamina ba reuniaun Konselhu Koordenasaun Munisipal hafoin retala ba Nasional hodi Ministeriu Obras Publikas solusaun.
Tanba nee husu Ministeriu Obras Publikas liu husi Servisu Munisipal Obras Publikas Baukau atu esforsu ba preokupasaun refere nunee Ministeriu bele foti medida halo intervensaun emerjensia ba kondisaun estrada diresaun husi Dailari ba Aldeia Bolehan.
Liga asuntu nee, STL tenta konfirma Diretor Servisu Munisipal Obras Publikas Baukau, maibe laiha fatin atu fo komentariu, tanba sei halao hela servisu iha fatin seluk.
(tom)
