BAUKAU, STLTIMORLESTE.com – Estrada rural ligasaun husi estrada Nasional Baukau-Dili iha area Postu Administrativu Vemasi ba Suku Uatulari iha Munisipiu Baukau ho distansia kilometru (Km) 12 daudaun nee kondisaun aat no grave.
“Estrada husi Uatilari ba Vemasi Vila 12 kilo dook la halimar, tempu bailoron nee ami asesu diak, maibe tempu udan nee ami labele asesu, tanba tau’u,” hateten Xefe Suku Uatulari, Venancio da Costa ba STL iha Vila Antiga Baukau, Sesta (27/07/2025).
Nia esplika, Suku Uatulari iha Aldeia tolu mak hanesan Aldeia Uaiharebo’o, Bahalala no Aldeia Naulale neebe potensial ba hortikultura, tanba komunidade maioria kuda fehuk, forerai no produtu lokal seluk tan neebe tempu kolheta faan iha merkadu lokal sira hafoin sustenta ba ekonomia familia.
Nia sublina, durante nee komunidade sira husi suku refere lori produtu lokal sira ba asesu merkadoria, difikulta tebes, tanba kondisaun estrada aat no la fasilita transporte publiku hodi tula sai produtu lokal sira ba iha nivel merkadu lokal hodi komunidade sira faan ba kompradores sira.
“Komunidade sira badinas halo toos no halo natar, maibe problema asesu merkadu mak susar, tanba estrada, maibe komunidade sira konsege faan iha merkadu, maibe sira lori tuir sira nia forsa, tanba transporte la too iha neeba,” Venancio da Costa akresenta.
Autoridade Suku Uatulari nee argumentu, durante nee komunidade sira tutur deit produtu lokal lao ain ho distansia kilometru 12 hafoin too iha merkadu Postu Vemasi faan ba kompradores sira no rendimentu neebe hetan sustenta ba ekonomia familia liu-liu sustenta oan sira nia eskola.
Venancio da Costa deklara, preokupasaun refere durante nee relata ona ba Servisu Munisipal Obras Publikas Baukau atu fo solusaun liu husi reabilitasaun, maibe seidauk iha resposta, tanba nee nafatin husu parte kompetente atu konsidera komunidade Uatulari nia preokupasaun, tanba estrada, eletrisidade no bee moos mak komunidade sira nia esperansa iha tempu ukun aan nee.
Liga asuntu nee STL tenta konfirma Diretor Servisu Munisipal Obras Publikas Baukau, Agostinho Ximenes, maibe laiha fatin atu fo komentariu, tanba tuir hela enkontru iha nasional.
Entretantu Suku Uatulari rejistu total populasaun hamutuk 1.623 husi Xefe familia 345 neebe maioria moris ho agrukultura.
(tom)
