BAUKAU, STLTIMORLESTE.com – Kondisaun estrada urbana iha Baukau Vila husi Nagardjo too Rotunda Vila Nova difikulta movimentu transporte publiku no privadu, tanba kondisaun aat, maibe sei hela ho promesa.
Padre Parokia Sagrada Coração de Jesus Vila Nova, Benediktus Randung hateten, progresu dezenvolvimentu ba infraestrutura baziku liu liu ba estrada iha Munisipiu Baukau, Governu Sentral liu husi Ministeriu relevante, kontratu kompanhia lokal halo ona reabilitasaun ba estrada ligasaun Kairavela too Lanud Baukau diresaun liu husi Kaisidu Suku Tirilolo tipu nahe alkatraun finaliza ona no daudaun fo vantajen ba komunidade sira ho transporte publiku no privadu asesu estrada refere.
Nunee mos Governu Sentral liu husi Ministeriu relevante kontratu mos kompanhia lokal balu daudaun implementa hela projetu reabilitasaun estrada ligasaun Suku Loilubu, Postu Administrativu Vemasi ba Suku Fatulia, Postu Venilale, maibe kondisaun estrada urnaba ligasaun husi Vila Antiga too Vila Nova no kontinua too area Nagardjo Uainiki, iha tempu udan difikulta komunidade sira nia movimentasaun ho transporte publiku no privadu, tanba kondisaun aat.
“Husi Nagardjo too mai Vila Nova nee aat liu, satan tempu udan nee bee nalihun iha estrada halo povu mos fadigadu loos ida nee mak problema boot ita haree ho matan rasik, hau mos husi Nagardjo mai Vila Nova liu husi estrada nee, loos duni movimentu araska,” hateten Pe. Benediktus Randung ba STL iha nia knaar fatin Vila Nova Baukau, Kuarta (21/01/2026).
Nia esplika, difikuldade neebe komunidade infrenta iha sira nia movimentasaun ho transporte mak hanesan, estrada diresaun husi area Nagardjo too rotunda Vila Nova kuaze aat no kuak iha neebe udan monu rai, kauza udan been nalihun iha fatin hodi difikulta motorista ba transporte kareta no motor.
Pe. Benediktus Randung sublina, problema ba estrada refere antes nee iha ona promesa husi Autoridade sira katak, atu halo reabilitasaun ba estrada refere, maibe too ohin loron seidauk akontese, tanba nee husu atu implementa hodi hatudu sidadaun Baukau nia bonita iha Timor Leste.
“Ita husu ba Governu oinsa atu halo atendimentu lalais ba ida nee atu nunee ita bele haree ona kor kapital nian, kuandu estrada diak nee kapital mak nee ona ligasaun ho movimentasaun transporte lao diak ona, maibe ita hein took, tanba promesa sira iha ona,” Randung akresenta.
Bibi atan iha Parokia Sagrada Coração de Jesus Vila Nova nee konsidera, mezmu promesa atu reabilita estrada urbana Baukau Vila nian iha ona, maibe ladauk implementa, tanba posibilidade, fundus ba implementasaun estrada urbana Baukau Vila husi Banku Mundial neebe konsidera sei iha faze negosiasaun, tanba fundu ba implementasaun estrada sira husi Banku Mundial.
Liga asuntu nee no seluk tan STL tenta konfirma Prezidente Autoridade Munisipiu Baukau, Veneranda Lemos, maibe la fo komentariu, tanba okupadu.
Entretantu implementasaun projetu estrada urbana Baukau Vila neebe antes nee Autoridade relevante sira iha Munisipiu Baukau relata hamutuk kilometru 23, neebe kobre husi Vila Antiga too Vila Nova no kontinua too area Uainiki Nagardjo, nunee mos husu husi Vila Antiga too Uainiki Nagardjo ligasaun ho estrada diresaun Baukau-Dili.
(tom)
