BAUKAU, STLTIMORLESTE.com – Motorista transporte publiku sira husu Ministeriu Obras Publikas (MOP) atu reabilita estrada nasional diresaun Baukau ba Dili, iha area Suku Bukoli, Postu Administrativu Baukau Vila, neebe ameasadu kotu.
Motorista Eujebio Coreira hateten, estrada nee monu afeta ba erozaun hafoin udan boot akontese iha fulan Fevereiru tinan nee, maibe too ohin loron parte relevante seidauk fo atensaun, tanba nee husu Ministeriu Obras Publikas halo reabilitasaun.
“Hau hakarak husu ba Governu hadia, tanba estrada neeba nee lori todan sae araska difikulta tebes ami kundotor sira,” hateten Eujebio ba STL, iha Vila Nova, Baukau, Sesta (15/08/2025).
Tuir nia, estrada nee iha parte suvida natoon no monu kuaze sentimetru 10 resin dadaun nee difikulta movimentasaun transporte publiku no privadu sira neebe tula sasan no ema.
Iha Slsorin seluk motorista bus diresaun Dili-Baukau, João Belo konta, kondisaun estrada nee dadaun transporte rua husi diresaun diferente labele hasoru malu, bainhira transporte ida too iha area estrada monu refere, transporte ida seluk tenke para hodi hein.
“Dala ruma iha neeba mos macet, tanba estrada kondisaun aat, agora ami hotu hotu hadau sorin deit, entaun kareta ida ba uluk ona ami tenke hein, tanba nee mak ami husi hakarak hadia lalais,” katak Belo.
Hatan ba kestaun nee, Diretor Servisu Munisipal Obras Publikas Baukau, Agostinho Ximenes rekonhese, estrada nee monu iha tinan 2025 no diresaun Obras Publikas Munisipal relata ona pedidu ba Ministeriu, tanba nee kompetensia Nasional mak bele foti dezisaun.
“Estrada nee ami liu husi koordenador destakadu nee ami relata dala tolu ona, maibe ate a data ami seidauk hetan informasaun ruma kona-ba andamentu nee too iha neebe,” katak Agostinho.
Diretor nee mos preokupasaun kondisaun estrada refere, tanba estrada refere diresaun nasional neebe fo asesu ba Munisipiu Vikeke, Lautem inklui Baukau ba Dili, maibe parte nasional seidauk relata nia andamentu kona-ba reabilitasaun.
Nia argumentu, mezmu seidauk iha andamentu husi Nasional kona-ba estrada refere, maibe hanesan dirijente Obras Publikas Munisipal kontinua tenta no koordena parte Nasional hodi foti dezisaun reabilita estrada refere, tanba bainhira la reabilita iha tinan nee, estrada refere sei kotu total kuandu udan monu rai.
Entretantu estrada nee iha tinan 2023 monu ukun ona no hetan ona reabilita husi kompanhia Sinar Satelite Unipesoal Lda ho valor orsamentu US$ 450,528, 75, maibe iha fulan Fevereiru tinan nee monu hikas fali, tanba erozaun.
(tom)
