BAUKAU, STLTIMORLESTE.com – Estrada Nasional diresaun Lautem-Baukau no Baukau Dili iha area juridiku Munisipiu Baukau, identifikadu iha pontu 5 amesadu atu kotu.
Diretor Servisu Munisipal Obras Publikas Baukau, Agostinho Ximenes rekonhese, mezmu projetu reabilitasaun estrada diresaun Lautem-Baukau neebe finalizadu seidauk utiliza too tinan 10 nomos diresaun Baukau-Dili inisiu fulan Janeiru tinan nee iha fatin 5 pertense area juridika Baukau nian amesadu atu kotu, tanba impaktu husi udan no erozaun.
“Klaru nia kondisaun rai halai perturba ita nia komunidade nia movimentu, iha fulan Janeiru estrada nee komesa aat hotu ona no iha Fevereiru nee ami relata hotu ona ba Ministeriu Obras Publikas enjineiru Nasional foti ona dadus ba manutesaun,” hateten Agostinho Ximenes ba jornalista sira iha nia knaar fatin Vila Nova Baukau, Tersa (31/03/2026).
Agostinho informa, estrada nasional Diresaun Lautem-Baukau no Baukau-Dili pontu 5 refere diresaun Lautem-Baukau iha pontu 4 neebe lokaliza iha Suku Buruma kompostu Komuloli, Kaisahe, Daeisi, Dokobere no diresaun Baukau-Dili iha pontu 1 neebe lokaliza iha area Luliheni, Suku Bukoli, Postu Administrativu Baukau Vila.
Nia sublina, kondisaun estrada pontu 5 refere Servisu Munisipal Obras Publikas Baukau hatoo ona pedidu urujente ba Ministeriu Obras Publikas iha Nasional neebe iha fulan Fevereiru tinan nee ekipa halo ona levantamentu dadus iha terenu atu halo manutensaun urujente, tanba bainhira estrada husi pontu 5 refere liu liu kotu iha area Kaisahe no Dokobere laiha dala alternativu atu fasilita movimentasaun transporte publiku no privadu diresaun husi Lautem ba Baukau.
“Tanba nee mak ita relata nafatin ba nasional, tanba estrada nee kuandu kotu dalan alternativu laiha, neebe ho kondisaun ida nee, se bele karik halo atendimentu lalais,” Agostinho sujere.
(tom)
