DILI, STLTIMORLESTE.com – Kondisaun estrada diresaun Postu Uato-Carbau too Suku Afaloikai, Postu Uato-Carbau, Munisipiu Vikeke aat, sempre difikulta movimentu kareta ambulansia.
Dehan Xefe Departamentu Servisu Emerjensia Medika Munisipiu Vikeke, Miguel Guterres ba STL liu husi telefone, Segunda (26/1/2026).
Tuir Miguel foin lalais akontese karreta ambulansia husi Postu Administrativu Uato-Carbau mout iha area Suku Afaloikai iha loron Tersa dia 20 de Janeiru 2026 atu ba tula pasiente inan isin-rua kondisaun bebe disresfetal no kontraksi la normal iha Suku Bahatata, Postu Uato-Carbau tanba estrada aat ho kondisaun tahu naruk.
Impaktu husi estrada aat halo karreta ambulancia nee rasik aat ho nee ambulancia refere dadaun haruka tiha ona ba Dili hodi halo manutensaun.
Xefe Departamentu Servisu Emerjensia Medika Munisipiu Vikeke sente triste ho kondisaun estrada neebe aat aliende husi Postu Uato-Carbau postu seluk mos kondisaun estrada hanesan, tan nee sempre difikulta servisu karreta ambulancia liu-liu iha tempu udan, ambulancia batula lalais pasiente ruma neebe ho kondisaun emersenjia susar atu responde ho lais no urjente.
Nunee mos, Alcino Fernades nuudar komunidade Suku Uani-Uma dehan, tan deit estrada aat sempre difikulta movimentu karreta-motor liu-liu karreta ambulancia karik akontese moras grabe ruma ambulancia atu tula lalais pasiente lori mai Sentru Saude Uato-Carbau no mai Vikeke susar la halimar. Tanba kondisaun estrada diresaun Uato-Carbau mai Munisipiu Vikeke mos sei aat. Nee duni, husu ba governu tau atensaun ba estrada liu-liu estrada rural hodi nunee bele fasilita komunidade sira asesu ba transporte publiku.
Tuir observasaun STL kondisaun estrada iha area juridiku Uato-Carbau maioria aat, estrada neebe governu tau ona aspal foin husi rai-ketan Postu Uatolari ho Uato-Carbau husi area Mota Kaidilalale, Suku Uani-Uma too vila Postu Uato-Carbau. Husi Suku Irabin Kraik ba Mota Irabere, Suku Irabin Leten, Suku Bahatata, Suku Loiulo liu ba Suku Afaloikai too rai-ketan entre Postu Uato-Carbau ho Postu Baguia, Munisipiu Baucau kondisaun estrada grave, too agora governu seidauk tau atensaun. Ho nunee, sempre difikulta movimentu transporte publiku liu-liu servisu emerjensia ambulancia.
(ger)
