LAUTÉM, STLTIMORLESTE.com – Kondisaun estrada husi Postu Administrativu Lautém too Postu Administrativu Tutuala aat no la diak, tanba nee Prezidente Autoridade Lautem ho Xefe Suku sira buka meus hodi hadia estrada nee halo diak.
“Ita nia Prezidente Autoridade Munisipiu Lautém (PAML) hamutuk ho Xefe suku sira, no mos kompanhia Xineza ida, hahu prosesualiza ona kona-ba konstrusaun estrada neebe ho kondisaun aat no la diak, hahu husi Postu Lospalos, area Trisula too Tutuala,” dehan Xefe Suku Bauro, Florindo Miranda ba STL iha sede suku Bauro, Domingu (05/01/2025).
Maibe nia dehan, husi konstrusaun estrada husi Trisula too Tutuala kondisaun la diak, entaun halo ema barak mos ladun iha interese atu ba vizita setor turizmu sira, liu-liu iha Valu no Jaco, tanba kondisaun estrada la diak, entaun PAM hamutuk ho Xefe Suku sira iha ona enkontru, oinsa bele halo konstrusaun estrada nee ho kondisaun diak.
Tanba kondisaun estrada sira liu-liu iha Postu Administrativu Lautém too Postu Administrativu Tutuala ba Lospalos Vila, kondisaun aat hahu husi 2017 too agora 2025, seidauk reabilita ka halo konstrusaun foun, nunee kuandu kondisaun estrada la diak bele trava mos movimentu publiku sira.
Kondisaun estrada kuandu aat bele limita mos negosiante sira bainhira ba faan produtu lokal sira, liu-liu iha merkadu no mos ema turistores sira atu ba vizita fatin istoriku sira mos difisil oituan, tanba nee prosesu ba hadia estrada refere iha ona prosesu atu halo konstrusaun.
Iha parte seluk, Xefe Aldeia Somotcho, Alberito Caetano dehan, kondisaun estrada husi Postu Administrativu Lautém too Postu Administrativu Tutuala kondisaun grave no la diak, tanba nee desizaun husi PAM atu halo konstrusaun ba estrada sira, liu-liu iha Suku Fuiloro area Trisula too Tutuala.
“Ita seidauk hatene montante orsamentu atu halo konstrusaun no kompanhia refere nee husi Xineza mak kaer projetu ba konstrusaun estrada nian, tanba fiar katak kualidade husi estrada refere bele fo kondisaun neebe seguru no estavel,” nia sublina.
Entretantu Prezidente Autoridade Munisipiu Lautém (PAML), Melio de Jesus afirms, kondisaun estrada husi Munisipiu Lautém barak mak la diak, maibe atu fo prioridade uluk ba estrada husi Postu Administrativu Lautém too Lospalos Vila, hafoin halo konstrusaun seluk, liu-liu iha Suku Fuiloro area Trisula too Tutuala nian.
Orsamentu ba konstrusaun estrada husi Postu Administrativu Lautém too Postu Administrativu Tutuala husi Orsamentu Jeral Estadu (OJE) 2024, Governu aloka ba Munisipiu Lautém hamutuk US$ 7.628.912. husi orsamentu nee ba programa hamutuk 13 mak hanesan, programa estrada no ponte hamutuk 261.105.
Husi programa dezenvolvimentu rural no urbanu hamutuk US$ 1.929.079, programa seguransa nasionál US$ 29.636 programa asesu ba justisa US$ 34.223, programa funsionamentu instituisionál US$ 2.163.115.
Tanba nee programa edukasaun pre-eskolar hamutuk US$ 269.582, programa ensinu báziku US$ 1.716.839, programa ensinu rekorente hamutuk US$ 2.448, programa kuidadu saúde primária US$203.569 programa agua saneamentu US$ 209.370, programa inkluzaun sosiál US$ 161.913, programa turizmu US$ 41.149, programa aumentu sustentavel produtividade no produsaun US$ 595.884.
(EST 1)
