BAUKAU, STLTIMORLESTE.com – Estrada distansia kilometru (Km) 10 resin iha Suku Tekinomata, Postu Administrativu Laga, Munisipiu Baukau, difikulta movimentu transporte publiku no privadu.
Xefe Suku Tekinomata, Abilio Diamantino Ximenes esplika, Suku Tekinomata kompostu aldeia haat mak hanesan Aldeia Kaikasalari, Itidaho, Samaguia no Bulibai, maibe estrada diresaun ba Aldeia Bulibai no Samalaria daudaun difikulta movimentu transporte, tanba kondisaun aat.
“Estrada fatin rua nee sei problema, ida mak estrada Bulibai nian kilometru lima, ida Tekinomata ba Samaguia kilometru lima,” hateten Abilio ba jornalista STL iha Vila Nova, Sesta nee (20/06/2025).
Nia sublina, kondisaun estrada ba aldeia rua refere difikulta movimentu transporte publiku no privadu, tanba iha fatin balun bainhira udan tau provoka rai kois difisil transporte ultrapasa, nunee obrigatoriu pasajeirus tenke foti desizaun tun husi kareta lao ain hafoin too uma.
Enkuantu seluk neebe husi uma atu ba merkadu faan sasan, obrigatoriu tenke tutur lao ain husi kilometru lima husi aldeia rua hafoin too estrada nasional diresaun Baukau-Lautem foin asesu transporte hodi kontinua viajen ba merkadu.
“Estrada fatin rua nee seidauk halo reabilitasaun ruma, hanesan Autoridade husu Governu fo atensaun ba estrada nee atu komunidade asesu ba merkadoria,” Abilio fundamenta.
Autoridade Suku Tekinomata nee konfirma, estrada diresaun ba Aldeia Bulibai fo asesu ba uma kain 70 resin no ba Aldeia Samaguia fo asesu ba komunidade sira husi Suku Namanei, Afasa, inklui Guruça.
Tanba nee husu Ministeriu Obras Publikas atu fo atensaun ba kondisaun estrada liu-liu ba Aldeia Samaguia, tanba estrada refere nuudar multi Suku no Aldeia.
(tom)
