BAUKAU, STLTIMORLESTE.com – Estrada rural hamutuk kilometru (km) 5 iha Suku Libagua, Postu Administrativu Laga, Munisipiu Baukau kondisaun grave, tanba nee husu ba governu atu hadia.
Informasaun nee hatoo husi Xefe Aldeia Libagua, João da Silva Gama ba STL iha Vila Antiga, Kuarta (08/01/2025).
“Estrada nee antigu nian hamutuk 5 kilo husi area Malai nian too Igreja Samalari, tempu udan nee difikulta ami, tanba rai monu karreta motor liu labele,” nia dehan.
Estrada rural km 5 nee tuir nia, nuudar estrada multi Suku no Aldeia, tanba fo asesu ba komunidade sira husi suku 3, kompostu Suku Samalari, Nunira no Libagua rasik, maibe liu-liu tempu udan fo impaktu ba komunidade sira, tanba durante ukun aan too ohin loron parte relevante, liu-liu Ministeriu Obras Publiku seidauk tau atensaun.
Daudaun tempu udan nee, estrada ligasaun refere iha area balu hahu fo ameasa atu kotu, tanba rai monu neebe kauza husi udan boot.
Tanba nee husu Governu liu husi Ministeriu Obras Publiku atu fo atensaun urjentemente, tanba komunidade husi Suku 3 liu-liu komunidade Libagua, maioria moris vida agrikultura neebe labele transporta hanesan kulu, fehuk, talas no seluk tan ba merkadu ho volume barak, tanba kondisaun estrada la fasilita transporte publiku too iha suku refere.
Enkuantu komunidade Libagua, Deolindo Filipe Gama argumenta, durante prosesu lori produtu lokal husi Suku Libagua ba merkadu Laga liu lao ain deit, tanba razaun dalan aat transporte publiku sira labele movimentu too iha Libagua hodi tula pasajeiru.
“Estrada liga ba ami nia suku aat, ami lori produtu lokal ba merkadu ami tenke lao dook,” nia katak.
João sente triste ho kondisaun estrada nee, tanba transporte labele asesu lori sira nia produtu ba merkadu, maibe tan nesesidade obrigatoriu komunidade sira tenke tutur lao distansia dook hodi troka produtu sira ba sentavus hodi sosa sasan neebe tuir nesesidade sira presiza ba auguenta moris nian.
Hatan ba kestaun nee, Diretor Servisu Obras Publiku Munisipiu Baukau, Agostinho Ximenes informa, estrada distansia refere antes nee Governu orienta ona kompanhia lokal balun halo reabilitasaun, maibe tanba ho ajudika direita la liu husi konkursu publiku, nunee iha tempu VIII Governu Konstitusional hapara no la halo pagamantu, mezmu kompanhia refere halo ona servisu balu.
No nia rekonhese, kondisaun estrada nee daudaun aat no grave, maibe atu halo reabilitasaun prosesu hotu iha nasional, tanba pagamentu ba kompanhia dahuluk neebe halo ona servisu Governu anterior seidauk halo pagamentu.
(EST 2)
