BAUKAU, STLTIMORLESTE.com – Estrada nasional, urbana no munisipal iha Munisipiu Vikeke hamutuk kilometru (Km) 80 resin seidauk halo reabilitasaun inklui mota boot no ponte difikulta movimentu ema ho transporte publiku no privadu.
Diretor Servisu Obras Publikas Munisipiu Vikeke, Casildo G. Soares esplika, tuir levantamentu husi ekipa tekniku Obras Publikas Munisipiu Vikeke ba estrada nasional husi Vikeke liga ba Postu Administrativu Uatukarbau, kontinua ba Iliomar Munisipiu Lautem nomos husi Vikeke ba Natabora, Manatuto, no husi Uatukarbau ba Ossohuna Baguia, Munisipiu Baukau.
Enkuantu estrada Munisipal sira mak hanesan husi Vikeke Vila ba Postu Uatulari, Lakluta, Dilor, Bikarin nomos husi estrada nasional parte Vikeke ba Uaitame Uatulari, husi Bebui Ledaloi ba Uatulari no husi Kaidilale ba Uatukarbau parte Bebui nian, neebe kuaze kondisaun aat, tanba seidauk halo reabilitasaun.
“Uatulari nian husi Bebui Ledaloi Uatulari nee 22 km, husi estrada nasional ba Uaiteme Uatulari Km 1 resin, husi Kaidilale mai Uatukarabau Bebui 14.47 Km, husi baliza Uatukarabau ho Ossohuna 22 Km, husi Bikarin ba Dilor kuaze 3 Km, husi Dilor mai Vikeke 20 km resin, nee Munisipiu ho Nasional,” informa Casildo ba STL liu husi telefone, Tersa (25/03/2025).
Nia konsidera, Diresaun Estrada Munisipal no Nasional neebe relatadu iha tempu udan difikulta movimentu transporte publiku no privadu, liu-liu komunidade negosiante sira, tanba kondisaun estrada aat difikulta movimentu transporte, la konsege transporta produtu komunidade sira nian ba asesu merkadoria.
Nia argumenta, parte Servisu Ministeriu Obras Publikas Munisipiu laiha kompetensia atu fo solusaun ba kondisaun estrada sira neebe daudaun aat hodi preojudika movimentu, tanba la ezekuta orsamentu, maibe hanesan parte tekniku iha rekolha dadus diriji ba ministeriu hodi fo solusaun.
Aleinde mos Diretor Servisu Obras Publikas Munisipiu Vikeke nee informa, mota neebe eziste iha Munisipiu Baukau baibain komunidade sira ho transporte utrapasa, kompostu kategoria Urbana, Munisipal no Nasional, hanesan mota Welolo tempu udan komunidade sira viajen husi Vikeke ba Natarbora no husi Natarbora ba Vikeke labele liu, tanba laiha ponte.
Nunee mos mota Irabere difikulta movimentu husi Vikeke ba Lautem iha tempu udan no mota seluk tan neebe kategoria pertense ba diresaun estrada urbana nian difikulta komunidade sira, inklui mota Baria laran no ponte Somako’o neebe tempu udan fo impaktu ba movimentu komunidade nian bainhira udan ho intensivu makaas.
“Nee sai difikuldade ba movimentu transporte iha Vikeke tomak, ponte Somako’o kuandu bainhira tempu udan sira labele utrapasa, tanba aat, nunee mos Vikeke ba Natarbora labele liu mota Welolo, tanba mota no ponte seidauk konstrui,” informa Casildo.
Nia esplika, ponte Somako’o distansia luan kuaze 16 metru neebe provizoriamente komunidade sira prega deit ai iha leten hodi utrapasa, maibe iha tempu udan, bee mota suli ho volume makaas labele ona ultrapasa, tanba sempre hetan sobu.
Enkuantu Mota Welolo tuir levantamentu dadus husi ekipa luan liu metru 40, seidauk iha pasadeira no ponte, maibe movimentu ema ho transporte husi Vikeke ba Natarbora utrapasa liu husi mota laran, neebe iha tempu udan impaktu ba movimentu.
Nia informa, kona-ba konstrusaun ponte iha Mota Welolo hodi fasilita movimentu parte ekipa nasional prepara ona dezenhu no daudaun iha ona prosesu laran, maibe atu implementa parte nasional mak hatene liu.
Enkuantu Ponte Somako’o neebe provizoriamente komunidade sira prega deit ai iha leten hodi fasilita movimentu inklui ho estrada ba Vikeke Vila iha ona prosesu laran hein prosesu implementasaun projetu iha terenu.
(tom)
