DILI, STLTIMORLESTE.com – Estrada liga Munisipiu Manufahi-Ainaro no Aileu presiza halo manutensaun antes, la presiza hein too aat mak hadia.
Kestaun née hatoo husi Deputada Bankada PD, Sancha Margarida katak, estrada Manufahi liga Ainaro iha parte Lihilolo nian, nunee mos estrada iha Aileu Sarlala aat, liu ba mai haree hela, maibe finji tiha la haree.
“Estrada Lihilolo nian nee aat kleur ona, enkuantu iha Sarlala nian, estrada ninin sorin sorin komesa monu, tanba nee husu ba Ministeriu relevante atu tau atensaun. Presiza halo manutensaun imediata, la presiza hein too aat loos mak foin hadia, tanba bele implika bá kustu neebe boot,” hatete Deputada Sancha Margarida, iha PN, Tersa (26/11/2024).
Aleinde nee kona-ba ponte ida iha Sarlala nian no iha Manufahi nian, iha intervensaun balu katak atinji ona 70 too 80%, maibe semana foin daudaun ba nee maske nia laos ema tekniku, maibe haree seidauk hotu ida.
Nia dehan, se husik hanesan nee deit mak tempu udan ho intensidade boot no mota tuun ho volume boot, ida nee bele estraga hikas ponte sira nee, no sei presiza hasai tan orsamentu boot.
Hatan ba preokupasaun nee, Visi Ministru Asuntu Parlementar (VIMAP), Aderito Hugo hatete, kona-ba preokupasaun neebe mak Deputada foti nia toma nota, nunee sei haruka ba Ministeriu relevante atu bele fo resposta mais kompletu ka detalhadu.
(gui)
