KELIKAI ANTIGA, STLTIMORLESTE – Ministeriu Administrasaun Estatal (MAE) aloka orsamentu hamutuk rihun US$ 28 liu husi Programa Nasional Dezenvolvimentu Suku (PNDS) ba projetu reabilitasaun estrada rural metru 600 iha Aldeia Uligata, Suku Afasa, Postu Administrativu Kelikai Antiga, Munisipiu Baukau, maibe too ohin loron la finaliza.
Liu husi konferensia imprensa, Porta Voz Grajela Ximenes esplika, projetu nee jere husi Ekipa Jestaun Suku Afasa kompostu husi Prezidente KPA, IEP, tejoreiru hetan akompanhamentu husi tekniku PNDS nian neebe akompanha trabalhador sira halao reabilitasaun estrada ho durasaun fulan 3 neebe implementa kedas iha tinan 2022, maibe too ohin loron seidauk iha progresu diak hodi fo benefisiu ba komunidade sira iha aldeia refere.
“Ami komunidade Aldeia Uligata lamanta tebes PNDS neebe implementa iha nee, tanba ho orsamentu montante rihun US$ 28 ba medida estrada metru 600 ho durasaun servisu fulan 3, maibe obra nee ekipa PNDS Afasa seidauk finaliza,” hatete Porta Voz nee, iha Uigata, Segunda (30/12/2024).
Maibe nia dehan, projetu nee ho tipu cor no plan neebe hahu husi area Loiba’alari too Budefu’u hamutuk metru 600, maibe implementasaun servisu iha terenu daudaun seidauk finaliza.
Nunee servisu reabilitasaun estrada neebe ekipa PNDS Suku liu husi trabalhador sira implementa mak cor ona besik metru 100 enkuantu metru 500 resin abandona too material balun konstrusaun nian hanesan sementi sei rai hela iha fatin servisu hetan estragus husi udan.
Tanba nee husu parte relevante sira atu haree asuntu refere, tanba orsamentu ba projetu reabilitasaun estrada refere husi Orsamentu Jeral Estadu neebe hanaran osan povu nian atu kore problema estrada iha aldeia refere, maibe realidade orsamentu rihun US$ 28 neebe aloka ba projetu reabilitasaun nee la fo benefisiu ba komunidade, tanba la finaliza too abandona.
Enkauntu reprezentante intelektual husi Uligata, Carlos Ximenes Filipe konsidera, total orsamentu rihun US$ 28 aloka ba projetu reabilitasaun estrsda kobre distansia metru 600 sufisiente hela, maibe la konsege finaliza, tanba ekipa la halo jestaun diak ba sementi rai deit iha udan laran hodi rezulta saka barak hetan estragus.
Bainhira estrada nee finaliza tuir medida tarjetu metru 600 sei fasilita komunidade uma kain besik 60 ba asesu transporte hodi transporta produtu lokal sira hanesan fehuk, talas, sabraka no seluk tan, tanba antes nee produtu lokal refere komunidade la konsege transporta volume barak ba asesu iha merkadu.
Nomos fo impaktu ba komunidade liu liu inan isin gravida sira atu fasilidade saude bainhira nesesidade obriga, obrigatoriu tenke hulan deit, tanba kondisaun estrada la permite atu transporte tula inan isin gravida sira ba fasilidade saude.
Tanba nee husu ba parte relevante atu haree no aselera projetu reabilitasaun refere, nunee bele fo benefisiu ba komunidade sira hodi lori sai produk lokal sira ba asesu merkadu lokal no Munisipal.
Ligadu asuntu nee, STL tenta konfirma Xefe Suku Afasa, maibe laiha fatin atu fo komentariu, nomos Diretor PNDS Delegasaun Territorial Munisipiu Baukau laiha fatin atu fo komentariu.
(EST 2)
