DILI, STLTIMORLESTE.com – Estrada iha area Perumnas, Suku Bairo Pite, Postu Administrativu Dom Aleixo, Munisipiu Dili nakfilak sai mota, hafoin udan iha horiseik (Segunda-red) loraik.
Bee neebe mak nalihun hanesan lagoa ka kolam nee tahan velosidade veikulu sira neebe liu husi fatin neeba. Motorista sira tenke esktra kuidadu tanba estrada nee aat no nakonu ho kuak.
“Fatin nee sai ona fatin baibain ida kada vez udan, bee husi valeta sulin sai bee poza ida neebe hanesan mota,” dehan Jose da Silva, motorista ida neebe liu husi fatin nee ba STL, Tersa (06/05/2025).
Jose deskonfia katak kanal drenajen neebe lokaliza loos iha dalan ba ema lao ain sira mak kauza ba bee neebe sulin ba estrada no nakfilak sai hanesan mota.
Aleinde valeta sira neebe klot, nia esplika kintal barak husi uma no loja sira susar atu uza hanesan area kaptasaun bee nian, tanba sira asfaltadu ka fundidu. “Agora ema barak nia uma oin ka kintal ita haree uza semente hanesan aspal hotu, nunee udan mai bee sulin hotu ba estrada,” nia dehan.
Atu ultrapasa ida nee nia afirma, abitante sira tenke proativu liu husi hamoos no normaliza drenajen sira beibeik, nunee udan mai bee bele halai tuir nia dalan.
Entretantu antes nee Ministru Obras Publika (MOP), Samuel Marsal halao ona observasaun ba progesu alargamentu estrada no valeta neebe konstroi husi kompanhia sira iha Dili laran.
(car)
