VIKEKE, STLTIMORLESTE.com – Daudaun nee dezenvolvimentu baziku iha Suku Maloru, Postu Administrativu Vikeke Vila, Munisípiu Vikeke, liu-liu estrada husi Postu Administrativu Vikeke Vila mai iha Suku Maluro kondisaun aat ba tinan barak ona.
“Estrada husi Postu Administrativu Vikeke mai too iha Suku Maluro kondisaun aat tebes, ohin ita boot sira mai haree ho matan, estrada nee aat tinan barak ona, seidauk bele hadia too agora,” hatete Xefe Suku Maluro Bendito Soares ba jornalista sira iha Sede Suku Maloru, Segunda (28/07/2025).
Nia dehan, dezenvolvimentu baziku iha suku paradu total kuaze tinan 5 ona, tanba Programa Liguefied Naturál Gas (LGN).
“Ita haree Suku Maluro nee aldeia tolu deit, maibe situasaun dezenvolvimentu iha suku nee paradu total ba tinan 5 ona, ita lori komunidade nain ulun sira, maibe too agora rezultadu laiha, rezultadu laiha tanba programa LGN mak hamate,” nia esplika.
Nia deklara, iha Munisípiu Vikeke, Postu Administrativu Vila, suku barak mak hetan dezenvolvimentu estrada neebe diak, maibe Suku Maluro kontinua estrada aat.
Iha fatin hanesan, Komunidade Suku Maluro, Bendita da Silva deklara, estrada husi Postu Administrativu Vikeke Vila mai iha Suku Maluro kontinua aat no komunidade sira labele asesu ba merkadu no Sentru Saude Vikeke Vila.
“Estrada tinan barak kontinua aat, ami triste tebes tanba inan isin rua sira kuandu kanotak moras no iha moras komplikadu atu lori lalais ba Sentru Saude Vikeke Vila tanba estrada aat, nomos ita atu lori produtu lokal ba faan mos labele tanba estrada aat no trasporte ladun iha,” nia afirma.
(jen)
