DILI, STLTIMORLESTE.com – Autoridade Lokal, Cejario Nasimento Pires nuudar Xefe Suku Afaloicai husi Postu Administrativu Uatulari, Munisipiu Vikeke, husu Governu liu husi ministeriu relevante atu normaliza estrada neebe estragus husi udan, nunee komunidade sira bele lori sira nia produtu ba merkadu.
Xefe Suku, Cejario Nasimento Pires ba jornalista STL liu husi telefone, Segunda nee (23/06/2025) hatete, antes nee estrada husi Postu Uatulari liu-liu husi Suku Afaloicai husi Parte Naedala ba iha Aldeia sira iha area rurais hanesan Aldeia, Lorosae, Haekiri Osocaiwa, Iraler, komunidade sira bele uza transporte publiku maibe ho tempu udan hahu iha fulan Marsu too mai ohin loron estraga total estrada husi Uatulari ba iha area sira remotas, tanba nee husu Governu liu husi ministeriu relevante bele normaliza nunee komunidade sira bele lori sira nia produtu husi aldeia mai iha merkadu iha Uatulari Naedala no sira mos bele sosa fali hahan ruma husi postu ba sira nia hela fatin.
Xefe Suku dehan, estrada husi suku laran Naedala husi mota Bebui too iha aldeia sira neebe mak remotas nee grave tebes hodi difikulta komunidade sira.
Hahu iha Marsu too mai agora komunidade sira labele halo movimentu ho transporte publiku hanesan mos motor no kareta tanba udan monu rai estraga hotu estrada komunidade tenke lao ain.
“Kuaze fulan rua resin ona ho tempu udan monu rai hahu iha fulan Marsu too mai fulan ida nee estraga estarada barak no oras nee kondisaun estrada grave tebes difikulta movimentu transporte husi Postu Administrativu Uatulari ba iha suku ba too aleia no husi aldeia ba mai fali suku,” dehan Xefe Suku Afaloicai.
Autoridade lokal dehan, liga ho estrada neebe mak aat, nuudar autoridade lokal relata ona ba iha Governu liu husi ministeriu relevante maibe too ohin loron seidauk iha resposta ruma.
“Nee dala barak ona, dala ruma hau ba hirus too iha Obras Publiku neeba, maibe kondisaun mak nunee, no hatoo ba munisipiu mos hau hatoo beibeik, ba iha Ministeriu Obras Publiku mos hanesan ba iha IGE mos hanesan, hau putar ba Dili nee dala 6 ka dala 7 ona,” katak Xefe Suku.
Nia hatete, hatoo dala barak ona maibe too ohin loron seidauk iha resposta ruma hodi solusiona problema neebe mak povu hasoru liga ho estrada.
“Iha Parte Ouanakai estrada kotu los tiha ona, komunidade sira atu asesu ba iha Aldeia Lorosae no Ireler, Ososkaiwa, liu fali husi ema nia odamatan oin, ema nia uma oin kedas, husu komunidade foo rai odamatan oin komunidade asesu lai neebe provizoriu uza hodi lao, komunidade mak la fo rai pedasuk iha uma oin nee entaun komunidade asesu ba iha Aldeia Lorosae, Iraler no Osokaiwa nee paradu total, laiha dalan alternativu seluk,” katak nia.
Iha biban nee Xefe Suku husu Governu liu husi ministeriu relevante sira hodi tau atensaun hodi hadia estrada iha Postu Uatulari laran ba iha area rurais sira, nunee komunidade sira bele lori sira nia produtu ba iha merkadu.
“Hau ho haraik aan husu dala ida tan karik bele Governu bele tau matan ba pelumenus halo normalizasaun nunee komunidade bele asesu estrada, tanba bainhira tempu udan difikulta tebes komunidade husi area rurais mai postu no suku hodi hetan hahan baziku hanesan foos, mina ruma, sira tenke baku ain husi Iraler, Lorosae, too Naedala sentru suku mak foin sosa foos, mina, masi midar ruma, no bainhira sosa tiha husi Naedala baku ain ba fali iha neeba (foho), tanba nee dala ida tan hau liu husi media STL neebe hatutan povu nia lian, ibun, tilun povu nia hodi relata ba Governu karik bele tempu badak bele normaliza para komunidade asesu estrada ho diak,” katak Xefe Suku.
Nunee mos Komunidade husi Aldeia Lorosae Antonio da Cruz hatete, uluk seidauk udan sira bele uza motor halai neineik bele tula foos ruma iha Uatulari liu-liu iha Naedala bele maibe ho udan monu rai estraga total estrada sira, wainhira presiza sosa foos ruma tenke lao ain husi Aldeia Lorosae too Naedala mak foin sosa foos, mina hahan seluk lori ba foho no sosa tiha obrigado tenke hulan deit tanba motor ho kareta labele liu tanba dalan kotu no tahu naruk.
“Husu Governu karik bele tau atensaun hodi hadia netik estrada husi Postu Uatulari mai iha aldeia sira neebe iha area remotas, tanba ami labele asesu estrada besik fulan tolu ona,” hakotu nia.
Iha Suku Afaloicai iha Suku 10 kompostu husi Aldeia Dacuate, Uaicai, Osocaiwa, Lari, Buibela, Lena, Watu-Ita, Caitao, kailake, Lorosae, no Total populasaun 6.272 rihun.
Notisia nee fo sai Media Suara Timor Lorosae (STL) seidauk halo konfirmasaun ba iha Governu liu husi Ministeriu Obras Publiku no IGE.
(eme)
