DILI, STLTIMORLESTE.com – Relasiona ho detensaun ba iha sidadaun Filipina Arnolfo Teves Jr, Provedor Direitus Humanus no Justisa (PDHJ) konsidera katak, atu estradita ema ida tenke desizaun mai husi Tribunal.
Tuir Provedor Direitus Humanus no Justisa, Virgilio da Silva Guterres katak, sira nia ekipa fiskalizasaun nian atu ba rekolha informasaun, Advogadu Teves nian mos kontaktu hodi informa kona-ba situasaun ida nee, haree mos iha media sosial Provedor tenta kontaktu ba iha Ministru Interior maibe la atende, tanba dala ruma okpudu ho servisu.
“Provedor nia pozisaun defende konstituisaun, ita nia konstituisaun artigu 35 hateten momos katak, estradisaun nee tenke desizaun Tribunal, katak Tribunal mak deside laos Ministru Justisa no Ministru Interior ou Prezidente Republika mak deside, nee Tribunal mak deside,” dehan Provedor ba STL iha Kaikoli, Kuarta (28/05/2025).
Nia hatutan, bainhira atu deporta ema no estradita ema tanba desizaun politika, nee ita viola ita nia konstituisaun, ita nia konstituisaun mos hateten katak, deportasaun no estradisaun nee halo banhira nasaun orijen husi sidadaun nee garante katak nia sei hetan prosesu justisa neebe justu garante la iha sentensa pena de morte no pena perpetua.
Reforsa, komunikasaun ho Juiz balu katak garantia iha ona, PDHJ mos konfirma ho Komisaun Direitus Humanus iha Filipina, Provedor Filipina nian kona-ba lei pena de morte no pena perpetua nee sira hotu informa katak, iha Filipina la iha pena de morte revoga tiha ona, ida nee iha razaun ba ita atu haruka fila.
Nia esplika, desizaun atu haruka fila nee tenke Tribunal laos desizaun politika, se ita halo ida nee primeiru ita viola konstituisaun no fo presedente la diak bq Estadu, Timor Estadu Direitu Demokratiku neebe lei mak tenke aas liu, laos desizaun politika mak sai fali panlima iha Estadu Direitu Demokratiku nian.
Iha fatin ketak, Akademiku UNTL, Rafael de Jesus dehan, atu estradita ema ida tenke liu husi desizaun Tribunal.
“Hau hanoin importante mak ita hakruk ba regra neebe iha, atu estradita ema ida tenke bazeia ba dalan legal nebee iha,” dehan nia.
Hatutan tan, ema hotu iha lei nia okos, tanba nee konsidera desizaun neebe Tribunal foti aas liu desizaun hotu.
(ter)
