DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial LDXS, tanba komete krimi hasoru lezada ho inisial EC.
Tuir akuzasaun neebe Juiz Prosesu Jose Gonçalves lee sai iha loron Tersa nee (22/04/2025) katak, iha loron 22 fulan Novembru tinan 2023, iha Aldeia 5 de Outubru, Suku Bairo Pite, iha lezada nia kios rona barulhu iha oin.
Momentu neeba arguidu ba hakilar iha lezada nia kios oin, hodi ameasa lezada. No arguidu mos estragus lezadu nia sasan sira hanesan janela odamatan, no vidru kios nian rahun.
Husi hahalok arguidu nian, lezada sofre prezuiju hamutuk US$ 534. Tanba nee Ministeriu Publiku akuza arguidu komete krimi Danu ho Violensia neebe previstu iha artigu 260 husi Kodigu Penal.
Hatan ba akuzasaun neebe iha, arguidu deklara katak, momentu neeba arguidu sira hemu hela tua, ho kondisaun lanu mak tuda lezada nia uma. Arguidu rekonhese sasan aat no arguidu promete sei hadia, no promete mos sei la halo tan aktu hanesan nee iha futuru.
Arguidu deklara, momentu neeba akontese tiha problema dader arguidu ba buka tuir lezada atu selu, maibe lezada lakohi hodi haruka lori mai iha Tribunal, ho nunee mak arguidu mos la selu. Maibe lori ona prosesu nee mai iha Tribunal, arguidu promete se lezada hakarak selu sasan sira neebe estragus, arguidu prontu hodi selu, maibe husu atu fo tempu hodi nunee arguidu selu kada fulan.
Iha sala julgamentu laran lezada EC deklara, se arguidu hakarak selu hodi hadia fali sasan sira neebe estragus, lezada mos aseita. Lezada mos deklara perdua arguidu, maibe sei fuan moras ho arguidu nia liafuan neebe hasai, kona-ba dehan lezada buan nee, halo lezada moe.
Lezada mos deklara, lezada hakarak arguidu mak hadia sasan sira neebe estragus hanesan odamatan no janela vidru neebe rahun, no husu arguidu mak buka rasik badaen hodi hadia.
Rona tiha arguidu no lezada, Tribunal husu ba iha Ministeriu Publiku no defeza atu tama ba iha alegasaun.
Iha alegasaun nee Prokurador Domingos Barreto deklara, arguidu konfesa ba faktus no deklara sei hadia sasan sira neebe estragus no konfirma ho lezada sira sei relasaun familia, importante arguidu hadia. Tanba nee Prokurador husu Tribunal tetu hodi aplika justisa ba arguidu.
Enkuantu husi parte Defeza Henrique Mariz deklara katak, arguidu konfesa ba faktus, tanba hemu lanu la kontrola aan ikus mai akontese tuda lezada nia uma. Arguidu mos arepende no prontu hadia estragus neebe iha, tanba nee husu atu halo alterasaun kualifikasaun jurdika ba iha danu simples.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu, Jumiaty Freitas, Jose Gonçalves, Jose Quintao, Ministeriu Publiku reprezenta husi Prokurador Domingos Barreto, arguidu hetan asistensia legal husi Defensor Publku, Henrique Mariz.
(ter)
