AMBENO, STLTIMORLESTE.com – Prezidente Komisaun Ezame Nasional 2025 iha Rejiaun Administrativa Espesial Oecusse Ambeno (RAEOA), Damiaun da Costa fo sai katak rezultadu ezame nasional tinan nee rejista estudante nain 15 reprovadu, maibe iha EBF 1,2,3 Ciclo Mahata 100% Aprovado.
Informasaun nee hatoo husi Xefe Departamentu INFORDEPE neebe sai nuudar Prezidente Komisaun Ezame Nasional 2025 iha Rejiaun Administrativa Espesial Oecusse Ambeno (RAEOA, iha nia knaar fatin Oecusse ba jornalista sira, Kinta (24/12/2025) katak, Ensinu Baziku Sentral (EBC) iha 23 maibe 21 nia rezultadu 100% ho total alunu 1.602, maibe husi total nee, nain 12 mak reprovadu, nain 6 husi Eskola Bazika Sentral (EBC) Palaban no nain 6 husi EBC Passabe.
Kona ba Ensinu Sekundariu Jeral (ESG) iha eskola hitu ho total estudante 1.062, maibe ESG lima mak rezultadu 100%, rua mak laliu persentajen ba reprovadu, husi ESG Palaban nain 1 no ESG Baki Suku Naimeko nain 7, ba Eskola Tekniku Vokasional (ETV), iha estudante 448 husi eskola haat ho nia rezultadu 100%.
“Rezultadu final ezame nasional tinan 2025, iha Oecusse nain 15 mak reprovadu. Rezultadu ida nee bazea ba rezultadu husi alunus, nia rasik mak prienxe iha ezame nasional, tanba sira rasik partisipa direita iha ezame nasional, laos tanba moras ba dezastre ruma, maibe tuir duni ezame nasional,” nia informa iha salaun edukasaun Oecusse, ohin.
Tuir nia, sira neebe la konsege partisipa iha ezame nasional, solusaun neebe Ministeriu Edukasaun fo sai katak, sei partisipa tan ba ezame segunda xamada. Maibe sira nain 15 neebe reprovadu partisipa direita.
“Agora depende ba sira nia aan, eskola sei la taka dalan ba sira, karik hakarak kontinua iha 2026, eskola nakloke ba ema hotu. Tanba kriteria bazea manual ezame nasional atu pasa, tenke hetan valor neen (6) ba leten kada dixipliña, maibe hetan valor lima (5) mai kraik iha dixipliña haat, nee reprovadu kedas,” nia afirma.
Iha fatin seluk, Diretor ESG Palaban, Juvinal da Cruz Salu, rekoñese laos eskola mak sala maibe estudante mak laiha preparasaun masimu ba ezame nasional.
“ESG Palaban total estudante 377 ho persentajen 99,7%. Ami rekoñese nain ida mak reprovadu iha siensia sosial, neebe todan nee laos husi profesor ka eskola maibe husi estudante nee rasik lakohi atu esforsa ho preparasaun tanba nia valor sira monu iha dixiplina ezame nasional sira hotu. Neebe, konforme husi estudante hakarak kontinua tan iha tinan oin, eskola nafatin simu,” nia hateten.
EBF 1,2,3 Ciclo Mahata 100% Aprovado
Iha fatin ketak, Xefe Departementu apoiu asaun sosial eskolar nian iha Rejiaun Oecusse, Sancia da Costa Neves reprezenta Diretor Rejional Edukasaun no solidariedade Sosial iha distribuisaun Anflope ba estudane EBF 1,2,3 Siclo Mahata, iha loron Segunda (22/12/2025) dehan, Rezultadu Ezame nasional tinan 2025 iha Eskola bazika Filial 1,2,3 Ciclo Mahata, ho total estudante hamutuk 73, 100% Aprovadu, maske iha tinan kotuk 2024, estudante iha eskola nee 14 pesoas reprovadu, maibe tinan nee sira pasa hotu.
“Hau agradese ba Edukasaun Rejional neebe delega hau ho kolega nain rua neebe maka mai akompanha distribuisaun anflope ba ezame nasional iha EBF 1,2,3 Mahata, Aldeia Mahata, Suku Cutete, Postu Administrativa Espesial Oecusse-Ambeno (RAEOA). Durante ami distribuisaun anflope lao kapas teb-tebes, ami apresia tanba distribuisaun anflope nee, estudante sira hamutuk 73 aprovadu hotu, tanba nee ami akompanha katak, durante tinan 3 profesores sira iha nee, dedika sira nia aan atu hanorin, sira hakarak alunus sira aprovadu 100% realidade ohin sira aprovadu hotu,” dehan nia.
Iha biban nee nia fo mensajen ba estudante sira iha EBF 1,2,3 Ciclo Mahata, liu-liu ba inan aman sira hotu atu kontinua suporta oan sir aba edukasaun, tanba edukasaun nee importante iha nasaun ida nee.
“Hau nia mensajen ba estudante sira iha eskola ida nee, liu-liu ba inan aman sira hotu, atu suporta nafatin oan sira asesu ba edukasaun tanba edukasaun nee importante ba ita nia oan sira nia futuru no nasaun ida nee mos presiza alunus sira atetude diak ho progresu neebe ke iha atu kontinua dezenvolve ita nia rai Timor Leste (TL). Husu mos ba manorin sira atu kontinua hatudu sira nia badinas no progresu neebe maka diak atu nunee nunee kontinua hanorin ita nia oan sira atu kontinua susesu, inan aman sira suporta nafatin oan sira, dudu oan sira iha prosesu hotu-hotu liga ba iha edukasaun,” dehan nia.
Iha biban nee Koordenadora EBF 1,2,3 Ciclo Mahata, Hermina Caet konfesa katak, bainhira simu knaar ida nee, iha ona mehi katak labarik estudante sira neebe eskola iha nee, tenke susesu hotu.
“Antes hau simu knaar nuudar Diretora iha EBF 1,2,3 Ciclo Mahata, hau iha mehi diak atu alunus sira susesu liu husi prosesu ida. Estudante sira durante eskola iha nee, tinan 3, signifika ami edukador la fasil atu eduka, tanba ema deha ita eduka ema nia oan, presiza tempu, tanba nee nuudar manorin nomos nuudar dirijentes, sente kontente tanba tinan ida nee, hau nia oan sira hamutuk 73 pasa hotu iha ezame nasional tinan 2025, la hanesan tinan 2024, kuaze estudante 14 maka reprovadu, tinan nee sira pasa hotu,” dehan Koordenadora EBF 1,2,3 Ciclo Mahata, Hermina Caet.
Nia haktuir tan katak, durante nee inan aman ho profesores sira, sempre kolabora serbisu hamutuk, tanba nee susesu nee laos Diretora mesak maibe hamutuk ho profesor no inan aman sira.
Jornalista: Joseph Koa
Editor: Joseph Koa
