BAUKAU, STLTIMORLESTE.com – Estudante hamutuk nain 5.542 iha Munisipiu Baukau, ohin hahu tuir ezame nasional ba anu letivu 2024.
Informasaun nee hatoo husi Diretor Servisu Edukasaun Munisipiu Baukau, Afonso dos Santos da Costa ba STL hafoin monitoriza ezame nasional loron dahuluk nian, iha EBC Tirilolo Baukau, Segunda (14/10/2024).
“Total Baukau nian ohin tuir ezame 5.542 husi eskola ensinu baziku, sekundaria no tekniku vokasional,” nia dehan.
Dirijente nee esplika, estudante refere husi eskola Ensinu Baziku Sentral no filial, Sekundariu Jeral no Paralelu inklui Tekniku Vokasional neebe iha Baukau, sentru ezame nasional hamutuk 68, kompostu ensinu baziku 41, esnisu sekundariu 22 no tekniku vokasional 5.
Nia sublina, ezame nasional refere hahu iha loron 14 Outubru, neebe ba estudante husi ensinu baziku loron 3, sekundariu loron 4, enkuantu tekniku vokasional loron 3.
Iha fatin seluk, Diretor Eskola Ensinu Sekundaria Jeral 01 Tirilolo Baukau, Estevao Ximenes Gusmão relata, estudante anu letivu 2024 husi ESJ 01 Tirilolo hamutuk nain 509 neebe husi programa CT 250 no CSH 259 hodi akumula ba sala ezame 26, neebe tuir orientasaun husi Ministeriu Edukasaun, kada sala ida akumula estudante nain 20 ho medida forma kadeira linha 4 metade metru ida.
“Ezame mak evaluasaun ba durante tinan 3 sira eskola, importante liu mak loron 4 iha ezame nasional, tanba atu prienxe rekezitu pasa ga la pasa mak ezame nasional,” nia akresenta.
Nia sublina, ezame nasional loron dahuluk iha ESJ 01 Tirilolo estudante nain 2 kompostu husi programa CT no CSH neebe sai aujente, tanba la partisipa.
(EST 2)
