DILI, STLTIMORLESTE.com – Estudantes 50 resin husi Eskola Baziku Filial (EBF) nu. 5 Komoro, ho inisiativa partisipa iha atividade kemping eskuteiru ba loron rua, hahu ohin no aban.
Lia hirak nee hatoo husi Koordenador EBF nu. 5 Komoro, Marcelino Moniz de Araujo ba jornalista sira iha atividade kemping eskuteiru iha EBF nu. 5 Komoro, Sabadu nee (15/03/2025).
” Ami nian atividade nee, atividade estra kurikular, laos ida nee deit, ami mos halao atividade desportu ninia, jogus, inklui ami halao atividade akampamentu ninia ba loron rua, hahu ohin too aban, importante husi atividades ida nee mak oinsa ita nian estudantes sira hatudu disiplina, karik aban bain rua liu husi baze eskuteiru mak bele hamosu espiritu voluntarizmu nomos respeitu,” dehan nia.
Marcelino akresenta, estudante neebe mak partisipa atividade kemping eskuteiru nee hamutuk 50 resin, nee estudantes husi EBF nu. 5 Komoro deit, estudante husi quinto ano nomos sestu ano husi eskola nee rasik.
“Karik bainhira udan tau ami bele muda sira mai iha sala aprendizajen, kona-ba halo kontrolu iha tempu kalan ninia nee ami iha maun no mana sira ho ami mak halo kontrolu ba sira, liu-liu ita nian estudantes sira lao ba mai iha tempu kalan ninia, nee ami halo kontrolu ba sira,” tenik nia.
(jac)
