BAUKAU, STLTIMORLESTE.com – Ministeriu Edukasaun (ME) nota estudante barak mak la hatene lee, hakerek no sura.
Hafoin remara serimonia inaugurasaun edifisiu Pre-Eskolar Avo Nana Irena Olimpia de Almeida Buruma, neebe realiza iha Suku Buruma, Postu Administrativu Baukau Vila, Munisipiu Baukau, loron 24 Marsu 2025, Ministra Edukasaun, Dulce de Jesus hateten, iha tinan 2024, ekipa Ministeriu Edukasaun kobre eskola sira iha territoriu nasional hodi hatene kualidade prosesu aprendizajen nian husi estudante sira neebe bele elabora ba iha planu nasional.
Liu husi identifikasaun neebe ekipa nota no relata ba Ministeiru Edukasaun, labarik barak mak la hatene le’e, hakerek no konta.
“Tuir dadus preliminariu ka sementara husi estudus, haree nivel labarik hatene le’e, hakerek no sura iha primeiru anu no segundu anu, sira teste estudante iha eskola, 2024 iha Timor laran tomak Baukau mak diak liu hotu,” hateten Ministra Dulce liu husi diskursu.
Governante nee argumenta, estudante husi ensinu baziku primeiru siklu, klase ida too rua neebe la hatene le’e, hakerek no suru, akontese ba estudante sira iha eskola husi munisipiu seluk, aliende Munisipiu Baukau, tanba kauza husi profesores sira nia pontualidade.
Nunee husu profesores sira atu disiplina ba pontualidade, profesores mak tenke too uluk iha eskola hafoin estudante sira too tuir, maibe estudante mak too tuir, hafoin profesores liu oras prosesu aprendizajen nian, fo impaktu ba estudante sira.
“Inspetor, Adjuntu, Na’i Xefe Suku, Inan Aman sira, ajuda tau matan ba ami nia profesores atu nunee bele iha oras loos tama eskola,” Governante nee rekomenda.
Ministra Edukasaun, Dulce de Jesus husu entidades sira iha nivel munisipiu hanesan inspetor eskolar no adjuntu, Autoridade Suku no komunidade inan aman estudante sira atu kontrola profesores sira iha oras prosesu aprendizajen nian, maibe bainhira profesores ida mak tama eskola la tuir oras neebe determina, fo impkatu ba estudante sira nia prosesu aprendizajen, tanba lakon oras balu hetan materia eskola.
Governante nee deklara, ekipa Ministeriu Edukasaun deit mak kobre labele, nunee husu tulun apoiu husi entidades hotu ajuda Ministeriu Edukasaun hodi fo kualidade edukasaun ba estudante sira, tanba sira mak futuru nasaun.
(tom)
