DILI, STLTIMORLESTE.com – Estudante Duarte Magno hateten, durante nee faan pulsa hodi selu eskola, tanba ekonomia uma laran la sufisiente hodi atende nesesidade uma laran nian.
“Hau durante eskola iha banku sekundaria oinsa buka osan rasik hodi selu,” dehan Duarte ba STL, Kinta (23/1/2026).
Nia dehan, nuudar joven no estudante iha banku eskola sekundaria lakoi depende ba inan aman maibe deside fila liman hodi selu ninia selu.
“Tanba inan aman moris vida agrikultura buka osan mos susar, tan nee iha hanoin ida katak tenke moris mesak hahu agora, basa husi kiik inan aman hikis kosar ben iha loron manas nomos iha tempu udan tanba deit oan no futuru,” Adianta nia
Nia hatutan, boot ona tenke ajuda fali sira maske laos servisu boot, maibe husi atividade negosiu kiik ida faan pulsa sigaru atu nunee bele hetan netik osan oituan hodi selu eskola, se osan la too hafoin husu sira para bele aumenta.
Nia konta, oinsa fahe tempu dader ba eskola fila mai ajuda sira iha uma halo servisu oituan, ba faan pulsa no sigaru i fila iha kalan.
Iha tempu kalan mak estuda materia neebe profesores sira hanorin iha eskola, kuandu depende inan aman hela deit se sira laiha husu ba se, tan halo netik buat kiik ida hetan osan ba moris.
Nia sublina, inan aman agrikultor faan produtu sira hafoin hetan, maibe iha area rurais hetan osan susar oituan, tanba produtu ladun folin tanba agora tempu udan ema hotu kuda.
(joa)
