DILI, STLTIMORLESTE.com – Atu evita susuk iha eskola, kada loron estudante ho profesores sira halo limpeza iha sala no areador Eskola Ensinu Baziku Sentral (EBC – sigla português) Manleuana.
Dehan Diretor EBC Manleuana, Carlos Correia ba STL iha nia knaar fatin Manleuana, Seguda nee (10/09/2025).
“Agora nee tempu udan, nee duni ita atu evita susuk iha eskola, ita tenke halo limpeza no iha sabadu nee husi saude lori aimoruk mai rega tiha ona iha ami nian eskola, no ami mos kada loron halo limpeza iha ami nian eskola, no ami husu ba estudantes idak-idak, karik han buat ruma iha eskola, foer sira tenke tau iha lixu nia fatin,” nia dehan.
Nia dehan, iha Sabadu mak ekipa saude lori aimoruk mai rega ona iha sala aprendizajen, la hatene bainhira mak sira bele mai rega fali, ida nee hanesan halo prevensaun ida ba susuk iha tempu udan, tanba moras dengue mos lao hela.
Entretantu Lucio de Jesus Moniz hanesan estudante, halo limpeza nee importante, nuudar estudante tenke hatene tau lixu iha fatin, ho nunee eskola bele moos no laiha susuk, hatene tau lixu iha nia fatin.
Iha fatin seluk, Kordenador Pre Eskolar Sagrada Familia Vila Verde, Cornelio Antonio Soares hatete, los duni daudaun nee tempu udan, oinsa mak halo limpeza iha eskola para evita susuk, prepara fatin lixu para estudantes sira tau lixu iha fatin, labele soe lixu arbiru iha areador eskola nian.
(jac)
