BAUKAU, STLTIMORLESTE.com – Estudante husi Eskola Internasional Dili, Hegelinha Auxiliadora da Costa voluntariamente konstrui fatin sanitariu publiku iha Suku Kabaida Makasae, Postu Administrativu Baukau Vila no hetan inaguradu husi Autoridade Postu Baukau Vila.
Xefe Suku Kaibada Makasae, Julio Alegria Belo hateten, durante ezistensia Suku Kaibada Makasae fasilidade publiku sira liu liu sanitariu publiku seidauk iha, tanba suku foun neebe foin lansa iha tinan 2024, maibe liu husi programa estajiada husi estudante Hegelinha Auxiliadora da Costa husi Eskola Internasional Dili konsege konstrui fatin sanitariu publiku ida iha Sede Kaibada Makasae neebe bele fo asesu ba komunidade sira.
Autoridade Suku nee agradese ba estudante Hegelinha Auxiliadora da Costa, tanba bele konstrui ona fatin sanitariu kuartu 4 kompostu sanitariu ba mane 2 no feto 2 no kompleta ho fatin fase liman rua, estabelese tanki bee ida inklui kanalizasaun bee husi torneira publiku ba fatin sanitariu publiku refere.
“Ita nia estudante ida ho naran Hegelinha nia pratika nia karidade husi eskola neebe haruka nia mai hijene nee. Ida nee fo asesu ba sede Suku, maibe atu fo asesu ba ita nia komunidade neebe iha Kaibada Makasae nee sufisiente ona ba ami,” hateten Julio ba jornalista sira hafoin inaugura fatin sanitariu publiku refere iha Kaibada Makasae, Domingu nee (27/07/2025).
Obra nain, Hegelinha Auxiliadora da Costa hateten, konstrui fatin sanitariu publiku refere nuudar programa husi eskola ba kada estudante atu implementa iha nivel Suku ba objetivu atu eduka sidadaun sira bainhira soe foer tenke utiliza fatin sanitiriu nunee bele prevene moras dairea no seluk tan.
Nunee agradese ba entidade sira hotu iha Munisipiu Baukau liu liu Suku Kaibada Makasae neebe bele simu programa refere implementa too finaliza.
“Hau agradese, tanba bele fo rai halo projetu toilet ida nee, liu liu fo agradese ba badaen no mama pai, tanba suporta ona hau nia projetu nee,” Hegelinha espresa.
Administrador Postu Administrativu Baukau Vila, Aires Coreira agradese ba apoiu husi estudante Hegelinha Auxiliadora da Costa neebe bele konstrui ona fatin sanitariu publiku ho kualidade no medida neebe sufisiente.
“Hau agradese tebes ba inan aman estudante husi insternational school, hau laos gaba maibe iha Baukau laran tomak foin primeira vez halo iha Suku Kaibada, tanba iha fatin barak hau haree estudante neebe halao estajiu, estajiu ho grupu, individual laiha, maibe husik hela buat diak iha Suku Kaibada,” katak Aires.
Administrador Postu Baukau Vila nee konsidera, projetu konstrusaun fatin sanitariu publiku iha Suku Kaibada Makasae nuudar asaun karidade husi Hegelinha Auxiliadora da Costa ho familia fo ba komunidade sira iha Suku Kaibada Makasae, tanba nee husu atu kuida, nunee bele utiliza ba tinan naruk.
Entretantu serimonia inaugrusaun nee hetan partisipasaun husi familia Hegelinha Auxiliadora da Costa, Autoridade Postu Baukau Vila, Komadante Eskuadra Postu Baukau Vila inklui Autoridade Suku Kaibada Makasae ho komunidade sira.
(tom)
