MATARAM, STLTIMORLESTE.com – Estudante ida husi Universidade Bumigora iha Sidade Mataram, Nusa Tenggara Barat, Indonesia, ho naran Roman Belo mate iha sala ida iha dormitoriu kampus refere.
Xefe Polsek Sandubaya, AKP Niko Herdianto iha Mataram, iha Segunda-feira, esplika katak sira hetan informasaun nee husi kolega falesidu nian neebe primeira vez hetan estudante semestre 6 neebe foti Farmasia husi Timor-Leste nee iha kondisaun mate iha Segunda-feira tuku dader, tuku 00.15 oras lokal.
“Vitima hetan primeira vez husi nia kolega sira iha dormitoriu. Nia mate iha pozisaun tani iha kraik kama ho uza headset iha nia tilun,” dehan AKP Niko.
Husi rezultadu investigasaun iha fatin akontesimentu, polisia cek ona sala dormitoriu fatin vitima hetan iha kondisaun mate.
“Kolega sira falesidu nian mos hetan ezaminasaun. Husi informasaun kolega sira nian, loron rua molok nee, vitima nee dehan katak nia moras, muta too raan sai. Entaun ami hetan medikamentu sira iha sala falesidu nian,” nia dehan.
Ba rezultadu visum externa, parte ospital dehan katak la hetan sinal violensia.
“Nunee, ba visum externa, la hetan sinal violensia iha vitima nia isin. Atu hatene ho klaru konaba kauza mate, presiza halo autopsia,” nia dehan.
Agora, mate isin haloot hela Hospital Jeral Mataram. Husi akontesimentu nee, polisia kontaktu ona parte familia vitima nian neebe hela iha Timor-Leste.
“Ba parte familia, ami kontaktu ona liu husi video call. Ami esplika kompletu informasaun neebe ami hetan iha kampu,” nia dehan.
Liu husi telefone, nia esplika, parte familia dehan ona katak sira simu ho vitima nia kondisaun no sira rejeita atu halo autopsia hodi hatene kauza mate Roman Belo nian.
“Nunee, agora ami ajuda hela esforsu hodi haruka mate isin ba Timor-Leste. Durante hein atu haruka isin mate fila ba Timor Leste, mate isin agora tau hela iha Hospital Jeral Mataram,” nia dehan.
(atr/stl)
