DILI, STLTIMORLESTE.com – Estudante Institutu Siensia Saude (ICS) mak futuru ba nasaun, tanba nee Institutu Nasional Kombate HIV- SIDA, Institutu Publiku (INCSIDA, IP) realiza sensibilizasaun informasaun kona-ba prevene virus HIV ba estudante sira.
INCSIDA, IP, Daniel Marcal dehan, joven sira husi estudante ICS matenek, maibe sei frazil iha pensamentu, tanba sira halo uluk depois sira foin hanoin ikus.
“Ita haree joven barak halo tiha uluk depois sira foin hanoin ikus, nee mak prizudika ema barak kona-ba HIV, joven barak kaben sedu, joven barak ita haree haluha sira nia futuru, tanba nee ita fo hanoin ba ita nia estudante ICS atu halo prevene virus HIV,” hatete Daniel Marcãl ba jornalista sira iha nia knaar fatin Pantai Kelapa Dili, Segunda nee (17/03/2025).
Nia tenik, sira la tau importansia ba sira nia futuru, sira la tau importansia ba sira nia terus, sira hatete sira mos iha konhesimentu, maibé atu tau ba pratika nee mak sei frazil liu.
“Dala barak ita nia joven sira nee frazil kuandu monu ona ba domin, kuandu monu ona ba domin nee sira nia pensamentu, sira nia vida tomak nee influénsia hotu, tanba nee mak ohin iha koordenasaun ho ICS mai iha nee fasilita joven sira atu hanoin sira nia futuru,” nia esplika.
Nia informa, joven sira agora prosesu domin nee moris hamutuk, sira la hanoin wainhira moris hamutuk nee sai inan no sai aman ona.
“Ita fó hanoin ba sira katak kaben nee tempu sei barak, maibé atu buka matenek no asegura imi nia futuru nee ohin laos aban,” nia deklara.
Iha fatin hanesan, Senadu Jeral ICS, Domingos Soares da Silva hatete, atividade ba loron ida ohin nee sente kontente tanba husi INCSIDA kolaborasaun ona ho ICS atu halo sensibilizasaun informasaun kona-ba prevensaun ba virus HIV.
“Promosaun ida nee bele aumenta liu tan ami estudante nia konhesimentu liu-liu iha area saúde nia nomos ida nee ita koalia liu ba prevensaun virus HIV, ita hatene katak moras HIV-SIDA daudaun nee numeru sae iha ita nia rain,” nia deklara.
Estudante nee husu ba INCSIDA atu kontinua nafatin promosaun, tanba estudante mak autor ba prevensaun ba moras HIV-SIDA.
(jen)
