DILI, STLTIMORLESTE.com – Estudante Departamentu Nutrisaun no Dietetika iha Instituto Ciências da Saude Dili (ICS) iha Segunda (23/03/2026), remata ona sira nia estajiu pratika klinika iha Hospital Nasional Guido Valadares (HNGV).
Iha serimonia enseramentu Xefe Gabinete Formasaun no Peskiza HNGV, Imaculada Filomena Lopes hamutuk no Xefe Departamento Nutrisaun HNGV, Francisco Ramos da Silva hamutuk ho Reitor ICS, Leão Borges mak halao.
Iha biban nee HNGV liu husi reprezentante Konsellu Diretiva HNGV entrega hikas fali estudante pratika klinika husi Departamento Nutrisaun no Diétetika ICS ba iha Reitor ICS hamutuk nain 33, kompostu husi feto hamutuk 22 no mane hamutuk 11 neebe halao ona pratika iha Departamento Nutrisaun HNGV nee durante fulan 2 , hahu husi Janeiro too Marsu 2026.
Tuir Estudante ICS Anoi Cardoso hatete, kontenti bainhira halo estajiu iha klinika sira, tanba liu husi estajiu nee bele halo pratika iha terenu husi teoria neebe sira hetan iha eskola.
“Hau kontenti durante iha estajiu bele halo pratika barak iha klinika, tanba iha estajiu nee hasoru direta ho pasiente sira. Neebe bele aumenta ami nia kapasidade no konesementu iha pratika nian,” dehan nia bá STL iha Komoro, Kuarta (25/03/2026).
Nia hatutan, durante iha teoria aprende liu kona bá materia, nunee bainhira mai iha estajiu sei hasoru barak liu iha pratika sira. Iha pratika nian nee alende aumenta kapasidade estudante nian, aumenta mos mentalidade tanba lor- loron hasoru hela deit pasiente sira.
(dom)
