BAUKAU, STLTIMORLESTE.com – Estudante hamutuk nain 56 husi Institutu Superior Cristal (ISC) Polo Baukau tuir juramentu iha Igreja Katedral Santo António Vila Antiga, hodi jura ba Biblia no Bandeira Nasional.
Informasaun nee hatoo husi Xefe Akademika ISC Polo Baucau, Marçal G. Soares ba jornalista sira hafoin remata misa juramentu ba estudante hamutuk nain 56 husi Fakuldade Saude, Departamentu Parteira no Enfermajen iha Igreja Katedral Santo António Vila Antiga, Baukau, Tersa (06/05/2025)
“Atividade neebe ISC Polo Baukau realiza ohin halo juramentu ba estudante Fakuldade Saude Departamentu Parteira no Enfermajen hamutuk nain 56 mak hatoo sira nia Kompromisu oinsa atu tun ba pratika pre-klinika iha sentru saude no Hospital Rejional,” hateten Marçal.
Xefe Akademika ISC Polo Baukau nee sublina, husi estudante nain 56, kompostu departamentu parteira nain 16 no enfermajen nain 40 kompostu feto 25 no mane 15.
Nia fundamenta, estudante refere sei halo pratika pre-klinika iha Sentru Saude Tirilolo, Postu Baucau Vila no Hospital Rejional Eduardo Ximenes Baukau tuir akordu neebe selebra ona.
“Estudante sira nee prontu ona, tanba antes nee sira juramentu, fulan rua ba kotuk sira tuir ona ezame pre-kompentensia, tantu eskrita no pratika laboratorium sai ona referensia ba sira nunee semana rua mai sira bele halao ona pratika pre-klinika nian,” Marçal akresenta.
Xefe Akademika ISC nee deklara, pratika pre-klinika refere estudante nain 56 sei halao durante fulan rua, neebe sei inisiu iha fulan Maiu 2025 too remata.
Estudante Agostinha dos Santos husi Departamentu Parteira neebe tuir juramentu hateten, prontu ona atu tuir pre-klinika iha fatin indikadu sira, tanba antes hetan ona teoria no pratika iha prosesu aprendizajen.
“Ezame pre-kompentensia ami tuir ona no ami sei tuir tan ezame kompentensia nian hafoin tun ba terenu, maibe ami prontu ona, tanba nee hau nia estudu atu atinji ba kareira neebe hau hakarak,” katak estudante Agostinha dos Santos
Enkuantu juramentu prezide direita husi Amu selebrante, Padre Paroquia Santo António Vila Antiga Baukau, Manuel da Silva Ximenes SDB neebe fo bensa ba estudante sira molok hahu pratika pre-klinika iha nivel fasilidade Saude sira.
“Hau nia alin doben sira parteira no enfermajen hakarak mai halo promesa atu sai disponivel Maromak nian no kontinua obra Maromak nian hodi bele salva ema nuudar kolaborador Maromak nian,” hateten Padre Manuel da Silva Ximenes SDB liu husi nia Omelia.
Entretantu partisipa iha serimonia juramentu nee husi inan aman estudante sira inklui Magnifiku Reitor Institutu Superior Cristal no responsavel Institutu Superior Cristal polo Baukau no dirijenti Hospital Rejional Eduardo Ximenes no Sentru Saude Tirilolo.
(tom)
