DILI, STLTIMORLESTE.com – Eskola Hotelaria no Turizmu husu Ministeriu Edukasaun (ME) atu sosa komputador ba estudante sira hodi halao pratika ba materia multimedia.
“Difikuldade neebe agora daudaun eskola enfrenta mak iha parte multimedia nee mak sei menus komputador ba ita nian estudantes sira, tanba eskola nian iha komputador haat, maibe nee mos uluk eskola mak hola ema nian komputador seken sira nee, tanba too agora husi ministeriu seidauk ajuda komputador,” dehan Adjuntu Diretor Eskola Hotelaria no Turizmu Bekora, Charles F. Guterres ba jornalista STL iha nia knaar fatin Bekora, Kuarta nee (23/04/2025).
Nia dehan, too ohin loron husi parte Ministeriu Edukasaun seidauk fo apoiu komputador ba sira nian eskola, ida nee mak sei problema hela, tanba labarik sira labele halo pratika ba iha disiplina multimedia ninia, tanba multimedia nee sai hanesan disiplina ida neebe estudantes husi departamentu hotu-hotu tenke tuir.
Iha Fatin seluk, Diretor Nasional Ensinu Sekundariu no Tekniku Vokasional, Fernando Mouzinho Gama hatete, ba eskola neebe fasilidade menus liu tenke esforsu aan nafatin para fornese fasilidade ba sira, liu-liu komputador ba sira relasaun ho ekipamentu informatika ninia garante sei fahe ba eskola sira.
“Fasilidade nee problema komum, neebe ita haree, tanba ita hotu hatene katak eskola tekvo nee hanesan eskola neebe ezije fasilidade barak no ezije mos profesor, infraestrutura, maibe ita fo prioridade ba buat balun neebe importante, liu-liu ita haree ba ita nian eskola sira neebe mak ita tau hanesan prioridade liu atu dezenvolve eskola tekvo, ita tenke reforma fasilidade ba ensinu tekvo,” katak nia.
(jac)
