DILI, STLTIMORLESTE.com – Estudante husi eskola sira iha Munisipiu Manatuto too agora seidauk asesu ba iha programa merenda eskolar.
Diretor Servisu Edukasaun Munisipiu Manatuto, Patricio da Cruz Quintao hatoo lia hirak nee ba STL liu husi telefone, Sesta nee (07/03/2025).
“Hau hanoin difikuldade neebe ami hasoru mak kona-ba programa merenda eskolar too agora ami nian eskola sira iha Manatuto seidauk implementa, maibe ita nian eskola sira iha munisipiu seluk programa nee lao hanesan baibain, espera katak iha tempu badak ami nian estudantes sira Pre Eskolar, Ensinu Baziku Filial no Ensinu Baziku sira bele asesu ba programa nee,” dehan nia.
Iha fatin seluk, Diretor Servisu Edukasaun Munisipiu Likisa, Julio da Silva hatete, kona-ba programa merenda eskolar iha Munisipiu Likisa lao hanesan baibain, nee duni estudantes sira kada loron asesu ona ba programa refere.
“Kona-ba programa merenda eskolar iha eskola sira Munisipiu Likisa lao normal hanesan baibain,. ami nian estudante sira kada loron asesu ba iha programa refere,” nia dehan.
(jac)
