BAUKAU, STLTIMORLESTE.com – Labarik estudante hamutuk nain 1.060 seidauk hemu aimoruk Albendazole, tanba kestaun distansia distribuisaun aimoruk la efetivu ba labarik estudante sira iha nivel eskola.
Diretor Servisu Munisipal Saude Baukau, Cristiano Cipriano Belo esplika, programa distribuisaun aimoruk Albendazole ba labarik estudante sira iha nivel eskola, tanba politika husi Ministeriu Edukasaun servisu hamutuk ho Ministeriu Saude hakarak prevene lae ba hamlaha, lae ba alkolika, lae ba moras kulit inklui lae ba bebidas no hahan midar neebe bele hamosu lombriga.
Nunee politika refere implementa atu halo prevesaun ba moras lombriga liu husi distribui aimoruk Albendazole ba labarik estudante sira iha nivel eskola, maibe labarik estudante balu seidauk hemu, tanba kestaun distansia distribuisaun aimoruk ba labarik estudante sira iha nivel eskola la efetivu.
“Distribuisaun ita halo iha tinan ida nee nia laran no eskola hotu-hotu ita fornese ona Albendazole ba estudante hotu-hotu iha Ensinu Baziku Sentral sira no ita iha ona dadus klaru katak labarik hira mak hemu ona aimoruk no labarik hira mak seidauk hemu. Kondisaun eskola balun dook infrenta ba distribuisaun ladun efetivu maibe koko ita prolonga tempu nunee labarik sira hetan hotu aimoruk Albendazole lombriga nee,” hateten Cristiano iha knaar fatin Tirilolo Baukau, Sesta (09/10/2025).
Diretor nee argumentu, relasiona labarik estudante balu neebe seidauk hemu aimoruk Albendazole, Servisu Munisipal Edukasaun no Saude Baukau halo ona avaliasaun servisu ba implementasaun programa distribuisaun aimoruk Albendazole, tanba nee sei kontinua distribui hikas iha tempu badak nunee labarik estudante sira bele livre husi moras lombriga.
Profesores José Maria Belo husi EBC Terseiru Siklu Letemumo Kelikai dekara, razaun labarik estudante sira lakohi hume aimoruk Albendazole, tanba impaktu husi issu balun, maibe labarik estudante barak mak hemu ona aimoruk Albendazole.
“Iha hau nia eskola kuaze alunus maioria mak hemu ona aimoruk lombriga nian atu nunee sira labele hetan moras lombriga. Iha ami nia eskola estudante kuaze nain 10 mak seidauk hemu tanba dala ruma sira rona informasaun husi liur dehan hemu aimoruk nee lanu muta tanba ida nee mak sira lakohi mai hemu, maibe ida nee ami hasai hela nia dadus hatoo ba saude lori fali aimoruk fahe ba sira,” katak José
Entretantu tarjetu labarik estudante sira kompostu Ensinu Baziku Primeiru Segundu too Terseiru Siklu iha Munisipiu Baukau hamutuk nain 30.142, neebe programa distribuisaun aimoruk hahu iha fulan Julhu too Setembru kobre ona labarik estudante nain 29.082 enkuantu nain 1.060 seidauk hemu aimoruk nee.
Jornalista: Tomas Reis
Editora: Carme Ximenes
