BAUKAU, STLTIMORLESTE.com – Durante implementasaun programa merenda eskolar husi primeiru too terseiru faze anu letivu 2025, estudante nain 3 iha eskola Ensinu Baziku Filial Katolika Uaimanuboe, Suku Uailili, Postu Administrativu Baukau Vila, Munisipiu Baukau laiha direitu hodi han hanesan nia maluk sira seluk.
Koordenador EBF Katolika Uaimanuboe, Andre Bras Belo informa, anu letivu 2025 eskola Ensinu Baziku Filial Katolika Uaimanuboe rejistu total estudante nain 99 kompostu estudante nain 96 existente no nain 3 transferida.
Estudante nain 3 nee transferida husi Dili ba eskola Uaimanuboe iha fulan Fevreiru 2025 no parte eskola submete naran ikus husi estudante nain 96 ba Servisu Edukasaun Baukau, maibe too ohin loron seidauk direitu alokasaun orsamentu hodi asesu merenda eskolar.
“Agora ami nia orsamentu nafatin ba nain 96 nian deit nain 3 nee lahetan, naran seidauk tama primeiru periodu submete hotu ona, maibe sira dehan lista 96 ba tiha ona nain 3 nee labele,” hateten Koordenador EBF Katolika Uaimanuboe, Andre Bras Belo ba STL iha Uaimanuboe Uailili, Sesta (22/08/2025).
Nia konsidera, mezmu estudante nain 3 refere naran submete ikus neebe la hetan direitu iha primeiru periodu nee loos, tanba naran submete ikus, maibe ba tuir lo-loos hetan fali iha segundu periodu, tanba iha segundu periodu lista submete ba ho total estudante nain 99, maibe iha segundu periodu no terseiru periodu nian estudante nain 3 refere nafatin hetan direitu alokasaun orsamentu ba merenda eskolar.
Nia argumentu, razaun saida mak estudante nain 3 refere la hetan direitu alokasaun orsamentu ba merenda eskolar nian, nia parte la hatene, maibe naran sira nee submete hotu ona ba Edukasaun Baukau liu husi eskola Ensinu Baziku Sentral Dom Bosco Fatumaka.
“Hau nuudar Koordenador eskola hau reforsa sira viola duni hau nia alunu nain 3 nia direitu, tanba hau iha eskola haree nia maluk falta mak sira foin hetan, se sira mai kompletu sira nian 3 la hetan,” Andre akresenta.
Liga asuntu nee jornalista STL tenta konfirma Xefe Departementu Parke Eskolar Servisu Munisipal Edukasaun Baukau, Sabino Arlindo Ximenes maibe laiha fatin atu fo komentariu, tanba halao hela servisu iha fatin seluk.
(tom)
