DILI, STLTIMORLESTE.com – Estudante nain 5 husi Eskola Sekundariu Teknika Vokasional (ESTV) No. 2 Lospalos neebe ninia Enderesu iha Aldeia Bemoris, Suku Fuiloro, Postu Administrativu Lospalos, Munisipiu Lautem, hahu loron Segunda (19/1/2026) halao Estajiu iha Media Suara Timor Lorosae Corporation (STL CORP).
Estudante nain 5 kompostu husi Nelia da Costa, Jose F. Delpiero da Costa Ximenes, Estela T.A. L Freitas, Jovanio da Costa no Alvita Gravila Monteiro nee akompanhia husi sira nia Profesor Belarmino Pinto Pereira, neebe iha loron Segunda (19/1/2026) mai iha STL, simu direita husi Senior Manajer Bisnis STL CORP, Florencio de Oliveira, Manajer Rekursu Humanu/Publisidade, Marcos da Silva no Managing Editor, Mikael Mali Mau.
Iha hasoru malu nee, Manajer Rekursu Humanu, Marcos da Silva no Manajer Bisnis, Florencio de Oliveira esplika kona ba lalaok servisu iha Media STL CORP iha departamentu haat kompostu husi bisnis, administrasaun, redasaun no imprime.
“Husi tuku 08:00-17:00 Otl, estudante sira halao estajiu no resposabilidade tomak iha STL nia liman, maibe fora husi oras servisu nian laós ona responsabilidade husi STL. Ba ami disiplina servisu no atitude durante oras servisu nian importante tebes. Tanba nee, durante fulan tolu estudante sira halao estajiu, tenke adapta ho kultura servisu Media STL nian,” dehan Marcos da Silva.
Nunee mos Manajer Bisnis, Florencio de Oliveira husu ba estudante sira neebe halao estajiu iha STL atu aprende didiak servisu saida mak funsionariu Media STL CORP halao, tantu iha departamentu bisnis, administrasaun, redasaun no departamentu imprime.
“Hau husu imi lalika moe atu husu saida mak imi hakarak aprende durante halao estajiu iha Media STL CORP,” katak Florencio.
Entertantu, Managing Editor, Mikael Mali Mau, esplika kona ba lalaok servisu redasaun nian ba media online, televisaun no jornal no mos esplika kona ba funsaun media nian mak hanesan fo informasaun ba ema hotu, eduka ema, halibur ema no media halao nia funsaun kontrolu sosial.
“Estudante sira mai estajiu iha nee atu aprende servisu neebe funsionariu STL halao, tantu iha parte bisnis, administrasaun, redasaun no imprime. Tanba nee, hau husu ba estudante sira atu badinas lee no hakerek,” tenik nia.
Iha sorin seluk, Profesor Belarmino Pinto Pereira hato’o agradese ba Media STL neebe ho laran luak simu estudante husi ESTV Lospalos bele halao sira nia programa estajiu durante fulan tolu iha Media STL.
“Ohin hau lori ami nia estudante nain 5 mai iha Media STL atu halao programa estajiu ho durasaun fulan tolu. Kona ba lalaok servisu ka kultura servisu iha STL, sira prontu adapta ho regra sira neebe iha. Tuir planu eskola nian programa estajiu realiza iha loron segunda (19/1/2026),” dehan Belarmino.
Nia dehan, Eskola ESTV Lospalos nuudar eskola teknika nivel sekundariu ho departamentu tolu kompostu husi Kontabilidade, Jestaun Ekipamentus Informatika no Komersiu).
Profesor Belarmino mos hatete katak programa ida nee reguler no obrigatoriu ba ESTV sira atu sira iha konhesementu kona ba merkadu servisu no bele pratika direita iha servisu fatin. Hodi nunee sira bele prepara sira nia aan no prontu ba asesu merkadu traballu no sai servidor neebe diak.
“Nuudar edukadores iha espetativa katak estudante sira laos iha konhesementu deit, maibe sira mos presiza iha abilidade no atitude neebe diak liu husi pratika servisu iha fatin neebe mak prontu atu simu no fasilita estudante sira hodi hetan esperiensia servisu iha instituisaun governu no instituisaun privadu,” dehan nia.
Agora dadaun, ESTV No. 2 Lospalos lidera husi Diretora Lidiana Maria E. S. Pereira, M. Ec.Dev.
(mik)
