DILI, STLTIMORLESTE.com – Total estudante sira neebe tuir ezame nasional no hetan numeru ezame hamutuk 54,128. Husi numeru nee estudante 1,000 resin la aprovadu mak hanesan husi eskola bazika estudante 25,120 hetan aprovasaun (97,52%), 640 la hetan aprovasaun (2,48%), Eskola Sekundaria Jeral estudante 23,486 aprovadu (96.82%), 444 la aprovadu (1.86%), ESTV total estudante 3,441 neebe hetan aprovasaun (100%), Edukasaun Rekorrente estudante 353 hetan aprovasaun (91.21%), no 34 la hetan aprovasaun (8.79%).
Liafuan nee haktuir husi Sekretariu Estadu Ensinu Sekundariu Jeral no Ensinu Sekundariu Tekniku Vokasional, Domingos Lopes Lemos liu husi konferensia imprensa neebe halao iha salaun Ministeriu Edukasaun, Vila Verde, Tersa (16/12/2025).
Nia dehan, ho sentidu responsabilidade no kompromisu neebe aas ba edukasaun maka Ministeriu Edukasaun fo sai rezultadu aprovasaun estudante nian ba tinan akademiku 2025, neebe rezulta husi ezame nasional sira neebe tuir ona. Numeru total estudante sira neebe tuir ezame nasional no hetan numeru ezame mak 54,128, neebe fahe iha nivel edukasaun oin-oin.
Nia katak, Eskola Bazika estudante 26,019, Ensinu Sekundariu Jeral estudante 24,168, ensinu Sekundáriu Tékniku Vokasional (ESTV) hamutuk 3,530, no edukasaun rekorrente estudante 411. Husi total estudante sira neebe rejista ona, tuir duni ezame nasional sira nain 53,518 ho estudante nain 640 neebe la partisipa iha prosesu nee, neebe reflete taxa partisipasaun neebe aas iha nivel ensinu hotu-hotu.
“Rezultadu sira neebe hetan hatudu katak maioria estudante sira kumpre ho satisfatoriu kriteriu aprovasaun nian, neebe distribui hanesan tuir mai, eskola bazika: estudante 25,120 hetan aprovasaun (97,52%), 640 la hetan aprovasaun (2,48%), Eskola Sekundaria Jeral estudante 23,486 aprovadu (96.82%), 444 la aprovadu (1.86%), ESTV total estudante 3,441 neebe hetan aprovasaun (100%), Edukasaun Rekorrente estudante 353 hetan aprovasaun (91.21%), no 34 la hetan aprovasaun (8.79%),” nia tenik.
Nia afirma, ME kongratula estudante hotu-hotu neebe hetan aprovasaun ba sira nia esforsu, dedikasaun no dezempenhu akademiku neebe hatudu durante tinan eskolar tomak. Ida nee mos rekonhese kolaborasaun husi profesor, supervisor, no sira seluk neebe envolve iha prosesu edukasional, neebe nia orientasaun, monitorizasaun, no apoiu sai krusial ba susesu neebe hetan.
“Ba estudante sira neebe la pasa, Ministeriu husu ba sira atu labele sai dezanimadu, hodi enkoraja sira atu haree etapa ida-nee hanesan oportunidade ida ba aprendizajen, hadia nafatin no preparasaun ba realizasaun akademika sira iha futuru,” nia afirma.
Nia hatutan, anunsiu rezultadu nee fo sai ba konhesimentu publiku, reafirma kompromisu ME nian ba transparensia, kualidade edukasional no promosaun exelensia akademika iha TL.
Iha fatin hanesan Ministra Edukasaun (ME), Dulce de Jesus Soares dehan, molok aprezenta dadus importante atu destaka katak tinan akademiku ida nee partikularmente ezijente, ezije nivel aas adaptasaun, kompromisu no reziliensia husi sira hotu neebe envolve iha prosesu edukasional estudante sira, mestre sira, inan-aman tutela sira no komunidade edukasional iha jeral. Kontestu ida nee fo signifikadu ida neebe signifikativu liutan ba rezultadu sira neebe agora hetan ona.
“Hau dirije ba ita boot nia Exelensia sira hodi fo sai rezultadu aprovasaun nian ba estudante sira iha tinan akademiku 2025, neebe determina bazeia ba ezame nasional sira momentu ida ho importansia espesial iha viajen akademika ami nia estudante sira-nian, tantu iha klase 9 Eskola Bazika nian no iha klase 12 Eskola Sekundaria nian iha tinan eskolar atual,” dehan nia.
Nia afirma, rezultadu sira nee maka espresaun ida neebe la iha duvida konaba dedikasaun, disiplina, no esforsu kontinua, neebe hetan apoiu husi monitorizasaun atensaun husi professor sira no apoiu permanente husi inan aman tutela sira.
Dulce sublina, aumentu iha media sira iha materia sira Portugues, Matematika, Siensia Fizika-Naturais, no Istoria no Jeografia, ho rezultadu neebe estavel nafatin iha tetum, no diminuisaun uitoan rejista iha Ingles.
Jornalista: Jacinta Sequeira
Editora: Domingas Gomes
