BAUKAU, STLTIMORLESTE.com – Estudante universitariu husi Universidade Publiku Surabaya (UNESA – sigla Indonezia) hamutuk nain 5 halao estajiu internasional iha Munisipiu Baukau.
Reprezentante magnifiku reitor UNESA, Asrori esplika, estajiu internasional nuudar programa ida husi UNESA neebe kada tinan haruka estudante sira halao estajiu iha nasaun identifikadu sira tuir kooperasaun universidade sira neebe parseria ho UNESA no tinan nee liu husi Universidade Dili haruka estudante nain 5 kompostu feto nain 4 mane 1 halao estajiu internasional durante semana tolu iha Munisipiu Baukau.
“Ami hakarak ami nia estudante nee bele hetan esperiensia neebe iha valor husi komunidade sira iha Timor Leste, tanba tuir istoria Timor Leste mos uluk pertense ba Indonezia, ami espera estudante sira nee bele implementa saida mak sira aprende ona iha kampus no sei aprende liu tan hamutuk ho komunidade sira iha Baukau,” Asrori hateten ba jornalista sira hafoin remata serimonia entrega estudante nain 5 refere ba Autoridade Munisipiu Baukau iha salaun Wewe Vila Nova Baukau, Segunda (30/03/2026).
Nia sublina, estudante nain 5 refere husi area estudu hanesan tekniku informatika, saude publiku, manajementu, sosiolojia inklui manajementu informatika.
Nia fundamenta, estudante nain 5 refere sei halao nia estajiu iha fatin diferente, mak hanesan estajiadu husi saude publiku sei halao estajiu iha fasilidade saude sira neebe identifikadu iha Baukau Vila, area Sosiolojia sei hamutuk ho halao peskiza komunitaria iha Suku 13, Postu Baukau Vila, enkuantu estajiadu nain 3 husi area estudu tekniku informatika, manajementu no manajementu informatika sei halao estajiu iha edifisiu administrasaun publiku sira iha Baukau Vila.
“Semana tolu nee ba ami la kleur maibe ami espera durante semana tolu nee sira bele aproveita tempu hetan buat foun diak iha Baukau,” Asrori akresenta.
Iha fatin hanesan, magnifiku reitor UNDIL José Agostinho da Costa Belo deklara, relasiona estudante nain 5 husi UNESA neebe halao estajiu internasional iha Munisipiu Baukau, tanba iha kooperasaun ho Universidade Dili no sei fo benefisiu ba Munisipiu Baukau liu husi estudante hirak nee nia estajiu no peskiza durante semana tolu iha Baukau.
“Sira halo estajiu halo mos peskiza haree husi parte saude, informasaun, jestaun nian saida mak sente durante nee ita enfrenta, husi dadus nee ajuda ita nia Baukau liu liu ba autoridade para sira hola politika ruma, tanba sira ema mai husi liur mai haree buat sira nee hotu rasional liu oinsa atu kontribui Baukau,” katak José.
Reitor UNDIL nee salienta, estajiu internasional nee mos nuudar pasu importante ida husi hadia kurikuli Timor Leste nian ba iha ASEA liu husi troka esperensia.
Enkuantu Sekretariu Munisipal Asuntu Planenamentu Dezenvolvimentu Integradu Baukau, Eduardo Filipe Ximenes agradese ba Universidade Publiku Surabaya neebe hili Munisipiu Baukau sai fatin estajiu ba estudante sira halao estajiu internasional no konsidera estajiu refere importante nuudar hametin kooperasaun setor edukasaun entre Timor Leste ho Indonezia, tanba nee Autoridade Munisipal Baukau kontinua iha komitmentu simu estudante sira husi Universidade sira iha ASEA halao estajiu iha Munisipiu refere.
“Ba oin ita nafatin simu estudante sira husi nasaun seluk hanesan Vietnam, Singapura bele halo estajiu internasional iha nee, karik Timor mos iha oportunidade bele ba Indonezia, Singapura, Vietnam halao estajiu iha neeba, tanba nee hau lori autoridade nia naran simu estudante sira nee ho liman rua,” katan nia.
Entretantu iha serimonia entrega estudante nee hetan partisipasaun husi Administrador Postu Baukau Vila, Segundu Komadante Polisia Munisipiu Baukau, respezentante Diretor Servisu Munisipal Saude Baukau no delegasaun UNESA.
(tom)
