DILI, STLTIMORLESTE.com – Estudantes husi Eskola Sekundariu Jeral nu. 4 Setembru Balide hamutuk 2.300 resin partisipa iha ezame primeiru periodu.
Tuir Diretor ESJ nu. 4 Setembru Balide, Sergio A. da Cruz dehan, total estudantes neebe mak partisipa iha ezame primeiru periodu hamutuk 2.300 resin, nee fahe ba turnu rua, dader no loraik, total sala neebe estudantes sira uza ba ezame nee hamutuk 24, kada materia han oras 45, nee bele dehan materia ida han oras 2, ezame nee sei remata iha loron Sesta.
“Ezame ba loron tolu nian lao ho diak, hakmatek no kontroladu, iha ezame nee laiha estudantes mak tur iha rai, maibe ami nian estudantes hotu uza meza no kadeira iha sala hodi bele tuir ezame nee ho diak, tuir sirkular husi ME katak, masimu estudantes iha sala 45, minimu 35, maibe tanba Eskola 4 Setembru nee ninia sala nee boot, entaun bele liu ida nee, ohin ezame ba loron tolu, nee ba materia tolu, nee mak hanesan fizika, português no CDS,” dehan Sergio ba STL iha nia knaar fatin Balide, Kuarta nee (09/04/2025).
Sergio dehan, mensajen ba estudantes sira, bainhira remata ezame tenke fila ba uma estuda ho diak, evita ransu livre, nafatin hakmatek iha uma, estuda tuir orariu ba materia sira neebe mak iha loron rua tuir mai.
Nunee mos estudantes husi ESJ nu. 4 Setembru Balide, Julia de Araujo Nunes hatete, ohin loron datolu ba ezame primeiru periodu no sei remata iha loron Sesta, nuudar estudante antes nee estuda ona, dader mai sedu eskola, tanba ezame halao iha tuku 8 dader.
“Ohin ami halao ezame ba loron datolu ba ezame primeiru periodu no sei remata iha loron Sesta, nuudar estudante antes nee estuda ona, dader mai sedu eskola, tanba ezame halao iha tuku 8 dader,” katak nia.
(jac)
