DILI, STLTIMORLESTE.com – Estudantes husi Eskola Sekundariu Jeral (ESJ) 4 Setembru Balide hamutuk 2.389 sei partisipa ezame segundu periodu.
Lia hirak nee hatoo husi Diretor Eskola Sekundariu Jeral 4 Setembru Balide, Sergio A. da Cruz ba jornalista STL iha nia knaar fatin Balide, Kinta nee (10/07/2025).
“Kona-ba ami nian preparasaun ba ezame ninia, nee hau hanoin lao kontroladu no prontu atu hlao ezame, tanba buat hotu fiksu tiha ona no hein halo ezame ba ita nian estudantes sira, nee duni ami nian estudantes sira sei partisipa iha ezame segundu periodu ninia, numeru total estudantes mak hanesan ohin hau mensiona nee,” dehan nia.
Sergio dehan, ezame nee sei halao iha loron Segunda, no estudantes sira husi eskola ida nee sei partisipa iha ezame segundu periodu ba tinan ida nee nian no profesores kada disiplina prepara ona pontus ezame ba estudantes sira.
“Ita husu estudantes sira estuda, tanba ita boot sira sei partisipa iha ezame segundu periodu nian, atu hetan valor neebe diak nee ita boot sira mak tenke hakas aan estuda, tanba ita boot sira durante nee simu ona materia husi ita nian profesor sira,” nia haktuir.
(jac)
