DILI, STLTIMORLESTE.com – Estudantes husi nivel ensinu baziku, sekundariu jeral no tekniku vokasional iha Munisipiu Bobonaro hamutuk 20 lakohi partisipa iha ezame nasional.
Diretor Servisu Edukasaun Munisípiu Bobonaro, Miguel Freitas dehan, estudantes neebe partisipa iha ezame nasional hamutuk 4019, no sira neebe lakohi partisipa nee makhamutuk 20 nee.
“Ita nian estudantes neebe mak partisipa iha ezame nasional hamutuk 4019. Estudantes nain 20 neebe lakohi partisipa nee kompostu husi nibel ensinu baziku, sekundariu no tekniku vokasional. Husi Ensinu Baziku nain 9, sekundariu jeral nain 2 no tekvo 9,” dehan Diretor Miguel Freitas ba jornalista STL liu husi telefone, Segunda (27/10/2025).
Miguel dehan, estudantes 20 neebe la partisipa iha ezame nee, iha segundu xamada sira la partisipa ona, tanba ba bolu estudantes sira nee lakohi mai partisipa iha ezame, nee duni sira mak lakohi tuir duni ezame.
Iha parte seluk, Diretor Servisu Edukasaun Munisípiu Likisa, Julio da Silva dehan, kona-ba estudantes partisipa ou la partisipa iha ezame nasional nee, dadus seidauk bele hatene lo-loos, maibe dadus provizoriu nain ida deit mak la partisipa iha ezame nasional.
“Ami nian dadus provizoriu nee nain ida deit mak la tuir ezame nasional, tanba nee ita presiza konfirma fali ho ita nian eskola sira, atu nunee bele hatene estudantes hira mak partisipa no hira mak la partisipa iha ezame,”nia informa.
Nunee mos Diretor Servisu Edukasaun Munisiou Manatuto, Patricio da Cruz Quintao hatete, agora dadaun foin ba foti pontus ezame nasional ninia husi eskola sira, tanba nee seidauk bele hatene dadus estudantes hira mak tuir ezame no hira mak la tuir.
Jornalista: Jacinta Sequeira
Editora: Domingas Gomes
