DILI, STLTIMORLESTE.com – Estudantes nain neen (6) husi Eskola Sekundariu Nobel da Paz kada fulan la selu propinas no sira eskola gratuita.
Jeremias P. de Jesus hanesan Diretor Eskola Sekundariu Nobel da Paz hatoo kestaun nee ba jornalista STL iha nia knaar fatin, Kuarta nee (21/05/2025).
“Iha nee ami nia kbiit laek nian oan nee iha grupu rua, ida parte husi uma mahon, sira ajuda liu husi dalan ida, agora grupu ida tan ema neebe oan nain tolu mak tama iha nee no kbiit laek nian oan hau sei ajuda nafatin sira, nee duni iha nain neen hanesan nee mak agora daudaun ajuda hela sira, kada fulan la selu propinas eskola nian. Nain neen eskola gratuita, nain nen nee ensinu baziku nain rua (2) no sekundariu nain haat (4),” nia dehan.
Jeremias dehan, estudantes nain neen (6) eskola gratuita nee mak feto nain ida (1) no mane nain lima (5), sira nee inan aman laiha kbiit, nee mak agora daudaun ajuda sira para sira eskola gratuita la selu propinas kada fulan.
“Grupu ida seluk mak ami nian eskola nee ema defisiensia mos tinan ida nee iha nain sanolu (10) hanesan nee, ida seluk mak la hatene koalia nee nain sia (9), nee balun ensinu baziku no balun ensinu sekundariu, sira nee bele selu maibe ida la selu los nee mak ami nian estudantes nain neen (6), nee sira la selu propinas kada fulan,” dehan nia.
Nia akresenta, Eskola Nobel durante nee ajuda ona kbiit laek sira nian oan barak ona, laos ba nain neen (6) agora nee deit lae, maibe dezde uluk kedas, ajuda ona kbiit laek nia oan neebe atu kontinua estudu iha nee.
Entretantu Carlito dos Reis nuudar estudantes husi Eskola Sekundariu Nobel da Paz hatete, Eskola Nobel nee sempre ajuda kolega balun neebe mak ninia inan aman kbiit laek, atu selu propinas nee eskola ajuda sira la selu, sira eskola deit, oinsa mak kolega sira uza oportunidade nee ho diak, para ba futuru sai susesu liu tan.
“Hau hanoin ami nian eskola nobel nee sempre ajuda kolega balun neebe mak ninia inan aman kbiit laek, atu selu propinas nee eskola ajuda sira la selu, sira eskola deit, oinsa mak kolega sira uza oportunidade nee ho diak para ba futuru sai susesu liu tan, tanba durante eskola iha nee gratuita,” dehan nia.
(jac)
