DILI, STLTIMORLESTE.com – Livru neebe mak Ministeriu Edukasaun (ME) tau ona iha eskola sira, estudantes bele lori ba uma atu nunee sira bele halo preparasaun ruma, antes sira ba iha eskola.
Liafuan nee haktuir husi Ministra Edukasaun (ME), Dulce de Jesus Soares ba jornalista iha edifisiu Ian Martin Balide, Kinta (28/08/2025).
Nia dehan, tinan ida nee ME koalia barak konaba literasia baze, tanba labarik presiza iha livrus neebe interesante, atu nunee labarik sira bele lee. Ho ida nee Ministeriu kontinua hakerek no sosa livru.
“Ita husu livru fahe ba estudantes sira, tanba nee ME liu husi inspektor eskolar no mentor eskolar iha mos kargu xefia sira no entidades barak neebe fo apoiu ba eskola sira. Ita husu atu ema hotu servisu hamutuk atu garante katak, livrus neebe ME tau iha eskola, laos livrus sira nee atu husik deit iha eskola, maibe estudantes sira tenke lori ba uma,” dehan Dulce.
Nia hatete, atu evita bainhira estudantes sira mai iha eskola mak sira foin rona materia neebe Professor nee hanorin, maibe kuandu sira lori livru ba uma, sira bele halo preparasaun ruma, antes sira mai eskola, depois atu evita katak, laiha tan maneira ida hanesan kopia iha kuadro, depois estudantes sira kopia tuir, ida nee tenke evita.
Iha fatin seluk, Diretor Eskola Sekundariu Jeral no 4 Setembru Balide, Sergio A. da Cruz dehan, kada loron sira nian estudantes sira sempre asesu livru neebe iha biblioteka, maibe livru ba disiplina balun maka sei menus.
“Kada loron ami nian estudantes sira sempre asesu livru neebe iha biblioteka, maibe livru ba disiplina balun mak sei menus, tanba nee ami halo ona pedidu ba ME para fo apoiu livrus neebe sei menus,” nia informa.
Jornalista: Jacinta Sequeira
Editor: Domingas Gomes
