DILI, STLTIMORLESTE.com – Estudantes Departamentu Eletronika husi Eskola Tekniku Vokasional 28 Novembru Bekora halo pratika.
“Sala 3-4 mak sei presiza relasiona ho laboratoriu no sala neebe seidauk reabilita signifika katak sala 3 mak sei presiza reabilita no sala laboratoriu iha eletrisidade presiza komputador ho nia meja Kadeira hotu. Sala laboratoriu ba futuru husi Departamentu Eletrisidade nee presiza meza no kadeira nomos presiza komputador. Ida nee laboratoriu departmentu eletronika nian agora daudaun estudantes sira halo hela pratika,” dehan Direitor Eskola Tekniku Vokasional 28 de Novembru Bekora, Tomas Pinto ba jornalista STL, Kuarta nee (28/05/2025).
Nia dehan, Inspetores husi Edukasaun Munisipiu nian halao inspesaun, ida nee arte grafika nian, iha laboratoriu halo pratika teoria iha ofisina eletronika. Antes ba laboratoriu no ofisina inspetor fo hela motivasaun no informasaun ba estudantes sira relasiona ho edukasaun sivika.
Iha fatin seluk, Diretor Eskola Hotelaria no Turizmu Bekora, Charles F. Guterres hatete, estudantes sira presiza halo pratika, maibe bainhira sira atu halo pratika nee presiza iha komputador neebe sufisiente ba estudantes sira, ho nunee bainhira sira simu hotu teoria nee presiza halo pratika, tanba estudantes iha tekvo presiza halo pratika.
“Ita nian estudantes sira presiza halo pratika, maibe bainhira sira atu halo pratika nee presiza iha komputador neebe sufisiente ba estudantes sira, ho nunee bainhira sira simu hotu teoria, nee presiza halo pratika, tanba estudantes iha tekvo presiza halo pratika,” dehan nia.
Nia dehan, difikuldade neebe daudaun nee sira enfrenta mak Departamentu ICT nee too agora seidauk iha sala propriu ida ba estudantes sira, tanba nee estudantes sira husi departamentu ida nee sira seidauk iha sala propriu ida ba sira.
“Difikuldade neebe ami hasoru mak ami nian departamentu balun neebe too ohin loron seidauk iha sala, nunee mos ami sei menus komputador ba estudantes sira atu halo pratika, tanba nee ami presiza tan komputador,” katak nia.
(eme)
