DILI, STLTIMORLESTE.com – Partisipasaun estudantes feto barak liu mane iha Dili Institute Of Technology (DIT).
Reitor Dili Institute Of Technology (DIT), Salustiano dos Reis Piedade hatete, agora haree ba iha partisipasaun estudantes feto sira nian iha DIT, nee duni prezensa estudantes feto nian barak los, tanba nee estudantes neebe mak rejístu iha DIT nee kuaze feto mak barak liu mane sira.
“Iha DIT nee kuaze partisipasaun feto nian 50% hanesan ho mane, tanba nee kuaze feto mane ninia nee 50% hanesan deit, nee hahu husi vise reitores tun ba iha dekanu, xefe departamentu, diretor unidades, nee kuaze feto ho mane ninia partisipasaun hanesan deit, mak 50% nee,” afirma Salustiano ba jornalista STL iha nia knaar fatin DIT, Kuarta nee (25/03/2026).
Iha fatin seluk, Reitor Instituto Ciensia Saude (ICS), Leao Borges hatete, feto nian partisipasaun iha ensinu superior, liu-liu iha instituto Ciência Saude (ICS) partisipa masimu, tanba numeru estudantes feto mak barak liu mane.
“Hau hanoin partisipasaun estudantes feto sira nian iha nibel ensinu superior, liu-liu iha ami nian instituto rasik masimu tebes, tanba ita kompara ho mane no feto nee kuaze feto mak barak liu. Nee duni feto nian partisipasaun nee boot tebes, tanba nee nuudar Reitor nafatin enkoraza estudantes feto sira nee katak, nafatin buka atu aprende diak liu tanba area neebe Sira hili iha sira nian estudu,” nia dehan.
Reitor ICS nee akresenta, oinsa estudantes feto sira bele partisipa masimu iha prosesu ensinu aprendizajen, tanba nee husu sira uza oportunidade neebe diak para aprende diak liu tan, kona-ba sira nian valoriza iha prosesu estudu, nee depende ba ema ida-idak nian esforsu neebe sira halo liu husi esforsu aan estuda.
“Feto sira asesu edukasaun mai too iha ensinu superior tanba sira mos hakarak aprende no hili area estudu neebe mak importante, maibe iha ami nian instituto nee haree liu ba iha area saude ninia,” nia esplika.
(jac)
