DILI, STLTIMORLESTE.com – Dirijenti Eskola Sekundariu Jeral nu. 4 Setembru Balide husu ba estudantes finalista sira tenke prepara aan estuda, hodi hasoru ezame nasional neebe sei halao iha fulan oin.
Diretor ESJ nu. 4 Setembru Balide, Sergio A. da Cruz hatete, nuudar direjente ida iha eskola ida nee apela ba estudantes finalista sira hotu tantu feto ka mane, tenke prepara aan estuda hodi hein ezame nasional, no husu hadok aan husi krimi ruma. Bainhira fila husi eskola ba los uma, hodi halo review fali materia neebe profesor sira fo ona.
“Preparasaun ba ezame nasional nian nee ESJ 4 Setembru prontu atu halao ou realiza ba ezame nasional, hein deit orientasaun husi Ministeriu Edukasaun (ME), no bazeia ba kalendariu edukasaun nian preparasaun ba materia sira nee, bazea ba matriks neebe mak simu ona husi ME. Professor sira mos agora duni hela materia neebe tarde nee, atu nunee estudantes sira bele partisipa maximu iha sala de aula,” dehan Sergio ba Jornalista STL, Segunda (08/09/2025).
Nia hatete, total estudantes finalista husi eskola ida nee hamutuk 1000 resin mak tinan nee sei partisipa iha ezame nasional. Nudar direjente iha eskola ida nee husu ba finalista sira prepara aan estuda, no labele komete iha krime ruma, tanba iha tempu badak sira sei partisipa iha ezame nasional.
Nia hatutan, estudante tenke evita husi ransu livre no labele halo violensia, depois tenke fokus ba iha estuda, husi eskola fila ba uma tenke hakmatek.. Preparasaun ezame nasional nian nee too agora husi parte eskola seidauk kria komisaun.
Nunee mos Estudante Leonita da Costa Moniz dehan, nudar estudantes finalistaneebe sei partisipa iha ezame nasional atu prepara aan estuda, liu-liu materia neebe durante nee kada professores fo ona ba estudantes.
Jornalista: Jacinta Sequeira
Editora: Domingas Gomes
