DILI, STLTIMORLESTE.com – Estudantes husi Eskola Hotelaria no Turizmu Bekora hamutuk 55, neebe durante nee partisipa ona formasaun lian inglês simu ona sertifikadu.
Diretor Eskola Hotelaria no Turizmu Bekora, Charles F. Guterres dehan, estudantes 55 durante nee partisipa iha formasaun lian inglês mak simu ona sertifikadu ho nivel A1 ou basic.
“Ami nian estudantes 55 neebe durante nee partisipa iha formasaun lian inglês mak simu ona sertifikadu ho nivel A1 ou basic. Inisiu 2026 sira sei kontinua ba nivel A2, inglês course. Ami nian estudantes hirak nee partisipa formasaun durante fulan tolu nian laran no sira partisipa iha loron Sabadu deit, tanba loron bai-bain partisipa iha prosesu de ensinu aprendizajen lao hanesan bai-bain,” informa nia ba STL, Kinta (25/09/2025).
Nia hatete, formador neebe fo formasaun ba estudantes nee nain 9 husi ISC, oras ba formasaun nee 90 minutes. Ho formasaun ida nee bele aumenta konhesimentu estudantes sira nian ba lingua inglês ninia.
Nia afirma, kona-ba lingua Japanese, kursu ida nee la fornese sertifikadu, tanba profesor voluntariu husi Japaun mak fo ho voluntariamente. Nee duni total estudantes neebe partisipa iha formasaun refere hamutuk 15 pesoas. Agora daudaun ita nian estudantes sei tuir hela formasaun lian Japonesa ninia,” nia esplika.
“Ita nafatin enkoraza ita nian estudantes sira, oinsa mak hola parte iha formasaun ba lian nee importante teb-tebes, molok sira remata estudu iha eskola ida nee,” nia tenik.
Nia hatutan, sira mos aprende ona liangua, nee hanesan aumenta konhesementu ba estudantes sira.
Iha fatin seluk, Diretor Eskola Sekundariu Jeral no 4 de Setembru Balide, Sergio A.da Cruz dehan, durante nee sira nian estudantes kada loron Sabadu partisipa iha atividades extra kurikkular ninia, balun partisipa iha atividades desportu no balun partisipa iha kursu lian inglês.
Jornalista: Jacinta Sequeira
Editora: Domingas Gomes
