DILI, STLTIMORLESTE.com – Estudantes husi eskola sira Munisipiu Dili seidauk asesu ba programa merenda eskolar, kona-ba munisipiu seidauk simu informasaun.
Haktuir Belchior Maria Almeida Barros hanesan Xefe Departamentu Programa Merenda Eskolar iha Ministeriu Edukasaun ba jornalista STL iha nia knaar fatin Vila Verde, Kuarta nee (06/08/2025).
“Implementasaun programa merenda eskolar iha eskola sira Munisipiu Dili seidauk lao, agora implementasaun merenda eskolar iha munisipiu hau seidauk hetan informasaun husi Ita nian munisipiu seluk, maibe ba eskola iha Dili nian, programa merenda eskolar seidauk lao iha eskola sira,” dehan nia.
Iha parte seluk, Koordenador EBF Fatumeta, José Manuel Pires dehan, durante semana rua agora tama ba iha semana tolu mak estudantes sira la asesu ba merenda eskolar, nee duni bele dehan sura hamutuk semana tolu merenda eskolar paradu too agora, fornesedór neebe tein ba estudantes sira nee nain lima, total estudantes iha eskola nee hamutuk 905.
“Kona-ba programa merenda eskolar nee, tanba ami nian fornesedór ho EJP nee seidauk submete relatoriu ba Ministériu Edukasaun, tanba nee ami seidauk iha merenda eskolar no daudaun nee sei paradu hela, tanba seidauk halo relatoriu hodi submete ba ministeriu, tanba hahu iha loron hitu too agora ami nian estudantes sira la asesu ona merenda eskolar, tanba seidauk entrega relatoriu ba ME,” tenik nia.
Entretantu Diretor EBC Manleuana, Carlos Correia afirma, grupu EJP sira mak implementa merenda eskolar, maibe durante semana hirak nia laran estudantes sira la asesu ba programa merenda eskolar.
“Ita nian grupu EJP sira mak implementa merenda eskolar, maibe durante semana hirak nia laran, estudantes sira la asesu ba programa merenda eskolar, tanba husi parte eskola nian halo kontrolu deit,” nia afirma.
(jac)
