DILI, STLTIMORLESTE.com – Estudantes mai iha eskola atu aprende, laos atu halo konflitu no hakerek naran organizasaun nian iha paredi eskola.
Kestaun nee hatoo husi Diretor Eskola Sekundariu Nobel da Paz, Jeremias P. de Jesus ba jornalista STL iha nia knaar fatin, Kinta nee (10/07/2025).
“Ita bele partidu no grupu ketak-ketak, maibe ita ema ida deit, tenke lao ba oin, ita tenke hakmatek, buat ida organisasi nee bele tama maibe nee grupu partikular iha uma, ida nee hanesan desportu ida tempu ida bele uza, labele lori nee ba asalta malu, oho malu, nee hau koalia beibeik iha Eskola Nobel da Paz no hakerek organisasi nia naran iha didin lolon sira nee hau apaga hotu ona, tanba hau laos simu fali arte marsiais, tanba ida nee sira nian privadu iha uma,” nia informa.
Nia dehan, laos atu aplika fali iha dalan, iha tempu badak bainhira estudantes sira remata ezame segundu periodu, eskola nobel sei konvida ESJ 4 Setembru Balide mai koalia ho diretor no estudantes sira, atu nunee sira labele hein malu iha dalan.
“Mai iha eskola nee atu aprende, laos mai para halo konflitu, nee labele, tanba nee mak foin dadaun vise PM mai ami nian eskola halo ona dialogu ho eskola 4 Setembru no ami nian rasik, tanba estudantes sira mak jerasaun ba rai ida nee, oinsa kria paz iha eskola no ho eskola seluk, nee importante tebes,” nia esplika.
Iha fatin seluk, Diretor ESJ 4 Setembru Balide, Sergio A. da Cruz hatete, bainhira Eskola Nobel da Paz atu konvida sira nian eskola, nee hanesan dalan diak ida ba estudantes sira para bele evita konflitu entre eskola rua nee.
“No ho hanoin diak bele hadook estudante sira husi konflitu. Durante nee hau lá haree ka nota estudante sira lori organisasi nia naran, maibe lori eskola nia naran, tanba nee importante no seita tebes,” nia dehan.
(jac)
