DILI, STLTIMORLESTE.com – Estudantes husi eskola sira munisípiu lima (5) mak asesu ona programa merenda eskolar, restu sei implementa iha semana oin.
Asuntu nee hatoo husi Belchior Maria Almeida Barros, hanesan Xefe Departamentu Programa Merenda Eskolar iha ME, ba STL, Kinta nee (12/02/2026).
“Ita nian implementasaun programa merenda eskolar nee balun lao ona no balun mak seidauk, nee duni programa nee lao ona iha eskola sira munisípiu lima mak hanesan, Dili, Aileu, Baukau, Likisa no munisipiu ida seluk tan, tanba munisipiu lima nee mak ita nian estudantes sira hahu asesu ona programa merenda eskolar iha idak-idak nian munisipiu,” dehan nia.
Nia akresenta, nee duni munisípiu lima neebe ohin mensiona nee mak implementa ona programa merenda eskolar, restu neebe seidauk lao nee semana oin nunee bele lao hotu ona, atu nunee estudantes sira hotu bele asesu programa nee hanesan ho sira nian maluk sira seluk.
“Restu neebe seidauk lao, hau konfirma ona ho sira katak, osan tama ona iha sira nian konta bankaria eskola, no balun tama iha grupu nian. Kona-ba menu ita fo orientasaun nafatin tuir buat neebe iha ona,” nia haktuir.
Nia dehan, ba programa ida nee Ministériu Edukasaun nafatin halo linha koordenasaun servisu neebe mak diak ho Ministériu Saúde no Ministeriu Administrasaun Estatal, nunee programa nee bele lao diak iha eskola sira.
Iha fatin seluk, Diretor Servisu Edukasaun Munisipiu Likisa, Julio da Silva dehan, iha Munisipiu Likisa merenda eskolar lao ona, tanba halo lansamentu iha dia 26/01/2026, nee duni estudantes sira husi kada eskola asesu ona ba iha programa merenda eskolar.
“Hau hanoin iha Munisipiu Likisa merenda lao ona, tanba halo lansamentu iha 26/01/2026, nee duni estudantes sira husi kada eskola asesu ona ba iha programa merenda eskolar,” nia informa.
(jac)
